Аймгийн Засаг даргын зөвлөлийн хурал боллоо. Хурлаар аймгийн хэмжээнд хэрэгжиж байгаа төсөл хөтөлбөрийн 2017 оны тайлан, гүйцэтгэлийг авч хэлэлцсэн юм. Энэ үеэр Засаг даргын зөвлөлийн гишүүд хэрэгжиж байгаа дэд хөтөлбөрүүдийг үгээ олохгүй магтаж, зарим тохиолдолд улсын хэмжээнд хэрэгжүүлэх тэргүүн туршлага маягийн зүйл ярьж өөрсдийгөө дэндүү дөвийлгөсөн. Үүнээс нь ичсэн үү яасан, эсвэл ам ажлын зөрүү илт байсан болохоор дуугүй суухыг эс тэвчсэн үү Баян-Өндөр сумын Засаг дарга С.Ганцогт “Иргэн танаа” сонин чинь иргэдэд хүрэхгүй байна. Эмч нарт харилцааны ёс зүй гэж алга” гэж нэлээн бухимдсан. Тэрбээр “Хэд хэдэн зүйлийг онцгой анхаарах шаардлагатай байна. Дэд хөтөлбөрүүдийн үр дүн, хүрч байгаа түвшин, иргэдэд хүргэх ажлыг хийх хэрэгтэй байна. Иргэн танаа сониныг уншиж байгаа хүн цөөхөн байгаа. Хүмүүст хүргэх мэдээлэл, сувгуудыг нарийн олох шаардлагатай. Эмч дэд хөтөлбөрийн хүрээнд олон хүний нийгмийн асуудал шийдэгдэж байгаа. Гэсэн ч хүмүүсийн харилцаа хандлага, оочер дараалал их байдгаас иргэдэд учрах хүндрэл их байна. Өрхийн эмнэлэг болон хувийн эмнэлгийг тэгш хүртээмжтэйгээр ашиглаж, эмнэлгийн тусламж үйлчилгээг сайжруулж, эмч нарын харилцаа хандлагыг өөрчлөхөд анхаармаар байна.  Ялангуяа БОЭТ-ийн эмч нарын харилцаа, хандлага төрийн ажлыг унагааж байна. Эрдэнэтчүүд Эрдэнэтчүүддээ хайртай дэд хөтөлбөр төрийн байгууллагын уялдаа холбоог сайжруулж өгсөн.  Ажилд ороогүй,  түр болон байнгын ажлын байраар хангагдсан иргэдийн тоог баг тус бүрээр гаргах, эргүүл хамгаалалтын ажлыг үргэлжлүүлэх саналтай байна. Амралт, чөлөөт цагийн талбай төслийг хэрэгжүүлэхдээ уялдаагаа сайн хангамаар байна. Баян-Өндөр сумаас 23 мянган өрхөөс санал авч, баг, сумын иргэдийн нийтийн хурлаар оруулж, Хөрөнгө оруулалт, хөгжлийн бодлого төлөвлөлтийн хэлтэстэй зөвлөлдөж, тоглоомын талбай хаана байгуулахыг гаргаж ирсэн. Гэвч хоёр жил дараалан санал авахгүйгээр таамгаар оруулчихлаа. Жишээлбэл, Зэст баг дээр өнгөрсөн жил нэгдүгээр микрийн 14,15 дугаар байрны дунд тоглоомын талбай тавьсан. Энэ жил 17,18 дугаар байрны дунд тавьчихаж байгаа юм. Тэгээд залгуулаад суман дээр 17 дээр байрлуулсан байх жишээтэй. Захын хорооллуудын хүрэлцээ шаардлага байгаа. Эсвэл байрны хорооллын дунд 0-14 насны тоглоомын талбайд тоглох хүүхдүүдийн судалгаа гаргачихаад байгаа газруудаасаа авахгүй, автоматаар оруулаад ирсэн. Нөгөө талдаа хурлын хуралдаан дээр нэг бодлогын байгууллага байж, энэ нь буруу, энд тавихгүй, хасуулна гээд байлтай биш. Уялдаа ерөөсөө хангагдахгүй байгаа. Энэ тал дээр онцгой сайн анхаараад өгөөч гэж А.Бумансор даргаас хүсмээр байна. Уг нь энэ тоглоомын талбай бүгд захын  хорооллын хүүхэд  багачуудын амралт чөлөөт цагийг зөв боловсон өнгөрүүлэх, биеийн тамир, спортоор хичээллэх нөхцөл боломжийг сайжруулах, аймаг, сумын мөрийн хөтөлбөрт орчихсон байгаа учир уялдуулж ажиллахыг хүсмээр байна” гэв. Дээрх ярианаас харахад, С.Ганцогт даргад баяр хүргэмээр юм шиг. Хуучин цагийн “дутагдлын хажуугаар дуугүй өнгөрч болохгүй”-н зарчмаар асуудалд зарчмын өөр байр сууринаас хандаж, бусдын утга учиргүй магтаад байгаа тэрхүү дэд хөтөлбөрүүдийн зарим үнэн нүүр царайг зоригтой “илчилсэн” түүнд “Браво” гэж хэлэх ч багадмаар.[sgmb id="1"]