Зэст багийн Ажлын албаны байранд УИХ-ын Тамгын газраас Хууль тогтоомж сурталчлах төвийг байгуулж, аймгийн ИТХ-тай хамтран ажиллахаар санамж бичигт гарын үсэг зурцгаалаа. УИХ-аас яагаад орон нутагт хууль сурталчлах төвийг байгуулж байна вэ гэхээр, иргэдээс парламентын үйл ажиллагаанд үнэлэлт дүгнэлт өгөх, батлагдсан хуулийн талаар мэдээлэл авах ажил дутмаг байгаад үндэслэсэн аж. Үүнээс гадна иргэд хууль батлах эхний хэлэлцүүлгийн үеэс эхлэн санал бодлоо энэ төвөөр дамжуулан УИХ-д хүргэх боломжтой гэж байна. Орхон аймаг Хойд бүсийн төвийн нэг төлөөллийн хувьд УИХ-д 8 гишүүн сонгосон ч ганц нь ч ажиллахгүй байгааг иргэд шүүмжилдэг. Учир нь хамгийн олон сонгогчтой Хөвсгөл аймаг руу Хойд бүсийн УИХ-ын гишүүд хуйларцгааж байгаа. Гишүүд нь тойргоо хаясан өнөөгийн 126 гишүүнтэй УИХ-ын үйл ажиллагааны цоорхойг нөхөх зорилгоор аймгуудад Хууль тогтоомж сурталчлах төвийг байгуулсан гэх талтай. Баянхонгор, Увс, Говьсүмбэр, Дархан-Уул, Өвөрхангай зэрэг аймагт дээрх төвийг байгуулж, Орхон аймагт зургаа дахь төвийг нээлээ. “Энэ төвд “Өсвөрийн парламент”-чид Монгол Улсын хууль тогтоох дээд байгууллага болох УИХ-ын үйл ажиллагаатай танилцах, суралцах үүд хаалга нээгдлээ” гэж албаны хүмүүс үзэж байна. Орхон аймаг иргэдэд хуулийн зөвлөгөө мэдээлэл өгөхөд зориулж, жил бүр Эрх зүйн хөтөч нарын цалингийн зардалд 78,5 сая төгрөгийг орон нутгийн төсвөөс шийдэж ирсэнийг онцолсон юм.