Аймгийн ИТХ-ын Тэргүүлэгчдийн ээлжит хуралдаан өнөөдөр болж байна. Энэ удаагийн хуралдаанаар дараахь таван асуудлыг хэлэлцэхээр төлөвлөжээ. Үүнд “Аймгийн ИТХ-ын ээлжит 23 дугаар хуралдааныгзарлах тухай, Иргэн төвтэй төрийн үйлчилгээ хөтөлбөрийг хэрэгжүүлэх арга хэмжээний хэрэгжилтийн явцын тухай, Сангийн дүрэм, удирдах зөвлөлийг шинэчлэн батлах тухай, Хугацаа сунгах тухай, шагналд тодорхойлох тухай” зэрэг асуудал багтжээ. Тэргүүлэгчдийн хуралдаанд аймгийн ИТХ-ын дарга Б.Мягмарсүрэн, тэргүүлэгч Ш.Ганбат, Д.Доржпүрэв, Д.Чулуунбат, Р.Рагчаа, Ж.Ганчимэг, Т.Соёл-Эрдэнэ нар оролцсон юм. Тэргүүлэгчдийн хуралдаанаас аймгийн ИТХ-ын ээлжит 23 дугаар хуралдааныг энэ сарын 31-нд хийхээр тов зарлалаа. Хоёр дахь асуудал болох “Иргэн төвтэй төрийн үйлчилгээ” хөтөлбөрийг хэрэгжүүлэх арга хэмжээний хэрэгжилтийн явцын тухай асуудал тэргүүлэгчдийн анхаарлын төвд байв. Энэ асуудлын хүрээнд тэргүүлэгчдийн зүгээс аймгийн Засаг даргын орлогч Д.Энхбат, Хөгжлийн бодлогын хэлтсийн дарга Г.Батдэлгэр, Хотын захирагчийн албаны дарга Б.Батжаргал, Төрийн захиргаа удирдлагын хэлтсийн дарга Ш.Ганболд нарыг дуудан оролцуулж аймаг, орон нутгийн өмнө тулгамдсан асуудал болон аймгийг Хөгжүүлэх Үндсэн чиглэлд туссан олон ажлуудын талаар асууж сонирхсон юм. Хуралдааны үеэр нийтийн тээвэр тойрсон асуудал анхаарлын төвд байж цаашдын чиг хандлагын талаар Хөгжлийн бодлогын хэлтсийн дарга Г.Батдэлгэр мэдээлэл өглөө. Нийтийн тээвэр тойрсон сэдвийн хүрээнд тэргүүлэгчдийн асуусан асуулт, санал Г.Батдэлгэр даргын хариултыг хүргэж байна.   Даваат, Яргуйт багийн иргэд хэдэн км газар шавар туучиж автобусанд суух вэ -Б.Мягмарсүрэн: Нийтийн тээврийн үйлчилгээ үнэхээр хүнд байна. ИТХ-ын зүгээс өнгөрсөн долоо хоногт багууд дээр ажилласан. Тэнд яригдаж байгаа тулгамдсан асуудал бол яах аргагүй нийтийн тээвэр тойрсон яриа байлаа. Даваат, Яргуйт багийн иргэд хэдэн км газар шавар дундуур туучин байж автобусанд суух юм бэ. Нийтийн тээвэр, Авто тээврийн үндэсний төвтэй нэгдээд бүтцийн өөрчлөлтөд орсон. Энд нийтийн тээврийг хариуцах хүн гэж байна уу. Эсвэл орон нутгийн өмчит үйлдвэрийн газар байгуулах уу. Иргэд маш их чирэгдэж байна. Хөгжлийн бодлогын хэлтсээс ямар бодлого барьж байна вэ?   Нийтийн тээвэр асуудалтай байгаа юу гэвэл “Тийм” гэж хэлнэ Г:Батдэлгэр: Засгийн газрын 55 дугаар тогтоолоор аймгийн Авто тээврийн газар, Авто тээврийн үндэсний төв хоёрыг нэгтгэхээр болсон. Тогтоолд нэгдсэн Авто тээврийн үндэсний төвд аймгийн ЗДТГ-т нийтийн тээврийн асуудал хариуцсан нэг мэргэжилтэн ажиллах тухай заасан. Яг энэ тогтоолын дагуу явна гэхээр орон нутагт боломжгүй нөхцөл байдал үүссэн. Энэ талаар Зам тээврийн яамнаас холбогдох мэргэжилтнүүд ирж байдалтай газар дээр нь танилцсан. Тогтоолын дагуу ажиллах бол орон нутагт нийтийн тээврийн асуудал хариусан орон нутгийн өмчит үйлдвэрийн газар байгуулах тухай Засаг даргын зөвлөлийн хурал дээр яригдсан. Хамгийн сүүлийн мэдээллээр Зам тээврийн яамны сайдын тушаал гарчээ. Яг бүрэн эхээрээ бидэнд ирээгүй байна. Бидэнд ирсэн мэдээллээр сайдын тушаалаар Засгийн газрын 55 дугаар тогтоолыг хэрэгжүүлэх тухай заасан. Мөн нийтийн тээврийн газрын бүтэц орон тоог нь Авто тээврийн үндэсний төв рүү шилжүүлэх тухай туссан байна. Энэ талаас нь харвал нийтийн тээврийн асуудал арай хаяагдчихаагүй байх шиг байна. Аймгийн хэмжээнд үйлчилж байгаа нийтийн тээврийн маршрут, чиглэлд өөрчлөлт гараагүй. Их залуу чиглэлд микро автобус явахгүй. Том оврын автобус явна. Бусад чиглэлд микро явж байгаа. Аймгийн хэмжээнд нийтийн тээвэр асуудалтай байгаа юу гэвэл “Тийм” гэж хэлнэ. -Б.Мягмарсүрэн: Яргуйт байгийн чиглэлд юу явах юм бэ? -Г.Батдэлгэр: Юу ч явахгүй. Өнөөдрийн байдлаар бид 5 чиглэлд нийтийн тээвэр явуулахаар төсөл сонгон шалгаруулалт зарлагдсан. Орон нутгийн нийтийн тээврийн үйлчилгээ эрхэлдэг аж ахуйн нэгжүүдээс сонгон шалгаруулалтад ордоггүй. Дээрх 5 сонгон шалгаруулалтаас нэг чиглэлд үйлчилгээ үзүүлэх аж ахуйн нэгж шалгарсан. Дөрөвдүгээр сарын 15-н гэхэд энэ чиглэл нээгдэнэ. Үлдсэн 4 чиглэлд сонгон шалгаруулалтыг дахиж явуулахаар төлөвлөж байгаа. -Б.Мягмарсүрэн: -Өнөөдөр Хөгжлийн бодлогын хэлтэст нийтийн тээврийн асуудал хариуцсан мэргэжилтэн байгаа юу. Орон нутгийн өмчит үйлдвэрийн газар байгуулахгүй нь гэж ойлгож болох уу? - Г.Батдэлгэр:-манай хэлтэст н.Оюун-Эрдэнэ гэдэг нийтийн тээврийн асуудал хариуцсан мэргэжилтэнтэй. Яамны сайдын гаргасан тушаалд зааснаар бол Авто тээврийн үндэсний төвд Тээвэр авто замын газрын бүтэц, орон тоог багтааж байгаа бол тусад нь орон нутгийн өмчит үйлдвэрийн газар байгуулахгүй. Өмнө нь бид Засаг даргын Зөвлөлийн хурал дээр орлогоороо өөрийгөө санхүүжүүлдэг аж ахуйн нэгж байгуулахаар ярьж байсан. Гэтэл нөхцөл байдал дээр тийм боломж байхгүй юм билээ. Тийм аж ахуйн тооцоотой орон нутгийн өмчит газар байгуулбал хот хоорондын том оврын автобус, жижиг таксины үйлчилгээний эрхийг авсаны үндсэн дээр ажиллах боломж бүрдэх гарц харагддаг. Хэдий болтол насжилт хэтэрсэн микрогоор үйлчлэх юм бэ -Т.Соёл-Эрдэнэ: Анх том оврын 10 автобус оруулж ирэхэд л би ачааллаа дийлэх үү гэж асууж байсан. Та бүхэн 10 автобусаар ачааллыг дийлнэ, тийм гэж хариулж байсан удаатай. Гэтэл өнөөдөр ямар байна вэ. Манай аймгийн нийтийн тээврийн асуудал чинь “шаварт суусан” дүр зураг л харагдаж байна. Микроны насжилтын асуудлыг яах вэ. 2015 он гарлаа. Хэдий болтол насжилт хэтэрсэн микрогоор үйлчлэх юм бэ? -Г.Батдэлгэр: Микронуудыг зогсоовол нийтийн тээврийн үйлчилгээ таг зогсоход хүрнэ. Бид том оврын автобусны хажуугаар аж ахуйн нэгжийг дунд оврын автобус оруулж ирэх тал дээр ажиллаж байгаа. Хугацаа нь дууссан микрог яах тухай ч асуудал хөндөгддөг. Шууд шугамнаас хасчих гэхлээр иргэдийн хувьд хүндрэл үүсэхээр байгаа. -Т.Соёл-Эрдэнэ: Та бүхний явуулж байгаа тэр сонгон шалгаруулалт нийтийн тээврийнхэнд тулган хүлээлгэлт үүсгэдэг. Сонгон шалгаруулалтаа эргэн хараач. Энэ бүхний цаана та бүхний хувийн хэвшлийнхэнтэй хэрхэн ажиллаж байгаа чинь харагдана. Тэр олон шалгуураа цөөлөх, орон нутагт зохицуулах боломж байна уу. Би нэлээн хэдэн удаа том автобусанд сууж үзлээ. 15 минутад нэг автобус явна гэдэг ч 1 цаг 30 минутын дараа автобус ирж байна. Буудал дээр хүлээгээд зогсчихдог. Микрог арай ч нэг цаг хүлээдэггүй байсан. Энэ бүхэнд чинь иргэд чирэгдэж гүйцлээ. Ашигтай чиглэлийг нь том автобусанд өгдөг учраас та нарын зарласан сонгон шалгаруулалтад хувийн хэвшлийнхэн орох боломжгүй. Үүнийг яаж шийдэх юм бэ? -Г.Батдэлгэр: - Аж ахуйн нэгжүүддээ дан микро биш дунд оврын автобус оруулж ирэхийг зөвлөдөг. Сонгон шалгаруулалт зарлахдаа тавигдах стандарт, насжилт, үйлчилгээг нь илүү хардаг тал бий. Бүх юманд хатуу хандвал түүнд тэнцэх аж ахуйн нэгж байхгүй. Өөрөөр хэлбэл, нийтийн тээврийн йүлчилгээ эрэхлдэг компаниуд хөл дээрээ босоогүй байна, чадавхижиж чадахгүй байгаа. Бодит байдал дээр манай нийтийн тээвэр гэж хэдэн хувийн машинтай иргэдийг нэгтгээд тэднээс татвар аваад тухайн чиглэлийн маршрутад гаргадаг. Ийм дүр зурагтай байгаа. Хувийн компаниудыг мэргэжлийн хүнтэй болох тал дээр нь анхаарч байгаа. Сонгон шалгаруулалтын бүх заалтыг эргэж харна гэж болохгүй. Аль болох орон нутгийн өнгө аясад тохирсон, дотоодын онцлогийг нь харж байгаа. Хөгжлийн бодлогын хэлтсийнхэн хариуцлагаа хүлээнэ шүү -Р.Рагчаа: Үндсэн чиглэлд суусан такси тоолууржуулах ажил яагаад хасагдав. Нийтийн тээвэр хариуцсан орон нутгийн өмчит үйлдвэрийн газар байгуулахгүй гэж ойлгож болох уу? Г.Батдэлгэр: Тэгэж ойлгож болно. Сайдын тушаалд Тээвэр авто замын газрын бүтэц, орон тоог Үндэсний төвд шилжүүлэх тухай заасан учраас ингэх шаардлага байхгүй. Таксины тоолуурын хувьд энэ ажлыг хувийн хэвшилтэй хамтарч хийхээр тусган ажилласан. Үүнийхээ дагуу хувийн хэвшилд газрын асуудлыг нь шийдээд өгчихсөн байгаа. Хувийн компани тоолуурын лабораторийг оруулаад ирсэн. Тоолууржуулах шаардлагыг ч тавьж байгаа. Компанийн зүгээс тоолууржуулах ажлыг нэг мөр хийх гэхлээр хөрөнгө санхүүгийн хувьд хүндрэлтэй байгаа тул ойрын хугацаанд тоолууржуулах ажлаа хийнэ гэдгээ мэдэгдсэн. Ийнхүү нийтийн тээвэр тойрсон асуудал эрдэнэтчүүдийн өмнө тулгамдаж байгааг тэргүүлэгчид хүлээн зөвшөөрлөө. Тэргүүлэгч Р.Рагчаа нийтийн тээвэр тойрсон асуудал дээр өөрийн байр сууриа хатуухан илэрхийлсэн. Тэрбээр “Нийтийн тээвэр элгээрээ хэвтчихээд байгааг бид мэднэ. Ийм байдлаараа 2016 онтой золгох юм уу. Хэрэв энэ асуудлыг өөр шатанд гаргаж чадахгүй бол Хөгжлийн бодлогын хэлтсийнхэн хариуцлагаа хүлээнэ шүү. Иргэд ч та бүхнээс хариуцлага нэхнэ. Одоо байгаа байдал мэдээллээс харвал ахиц өөрчлөлт гарахад хүнд байна” гэлээ. Н.Төр