Аймгийн Засаг даргын даваа гарагийн шуурхай зөвлөгөөн дээр С.Батжаргал дарга нийтийн нүдэн дээр ил байдаг, хор хөнөөл үр дагавар ихтэй хэрнээ хэн ч гаргаж тавьдаггүй нэгэн асуудлыг хөндсөн юм. Тэрбээр “Аймгийн зүгээс утгаа гаргадаг нэг ч гэсэн янданг өөрчлөх гэж, гэр хорооллын утааг бууруулах гээд зүтгэж байхад нэмээд зам дагуу утаа гаргадаг яндан бий болгоод байна. Авто зам дагуу түлээ, нүүрс борлуулдаг энэ асуудлыг цэгцлэх цаг болсон. Тэрхүү түлээ, нүүрс борлуулдаг жижиг цэгүүд замын хөдөлгөөний аюулгүй байдалд ч сөргөөр нөлөөлж байна. Замын бродютэй нийлүүлээд түлээ, нүүрсээ тавьчихдаг байдал нь ийм нөхцөл байдалд хүргэж байна. Дээр нь тамхи худалдаалдаг цэгүүд чинь хэрээс хэтэрлээ. Арга хэмжээ авахгүй бол болохгүй нь. Түлээ нүүрсийг Эрдэнэт хотод үйл ажиллагаа явуулдаг зургаан захаар худалдаалж байна. Тэндээс иргэд хэрэгцээнийхээ түлээ, нүүрсийг модны захаасаа авдаг. Тамхийг ч гэсэн томоохон Худалдааны төвүүдээс авч болоод л байсан. Одоо зам дагуу олон тамхины цэг байгуулж эхэлснийг эргэн харах цаг болжээ. Зам дагуу тамхи, түлээ нүүрсний цэг гаргаад түүний үр дүнд шинэ ажлын байр бий болоод байна уу гэтэл үгүй юм билээ. Дандаа сүлжээ байгуулсан байна. Ийм байж болохгүй. Үүнийг цэгцэлж хямгадах цаг болсон” хэмээсэн юм.

Гэр хорооллын иргэн та зам дагуу хэдэн шуудай түлээ, нүүрс тавиад амьжиргаандаа нэмэр болох, өөрөө өөртөө ажлын байр бий болгох гээд зогсвол маргааш л гэхэд багийн Захиргаанаас, мэргэжлийн хяналтаас, Баян-Өндөр сумаас ирээд таныг Зөрчлийн хуулиар доод тал нь 100 мянган төгрөгөөр торгоно. Дээр нь өнөөх хэдэн шуудай түлээ, нүүрсийг улсын орлого гэж хэлээд хураагаад аваад явчихна. Харин Баян-Өндөр сумаас тамхины худалдаа, зам дагуу түлээ, нүүрсний худалдаа явуулах зөвшөөрөл олгодог. Энэхүү зөвшөөрөл иргэдэд дэндүү үнэтэй, олдоц муу, танил тал ар өврийн хаалгагүй бол шонгүй гэсэн үг. Баян-Өндөр сумын Засаг даргаас зөвшөөрөлгүй бол цагдаа ирээд хураагаад л явчихна. Харин Баян-Өндөр сумын удирдлагууд түлээ нүүрс, тамхины худалдааны энэ эмх замбараагүй олгосон зөвшөөрлийг эргэн харахгүй бол Эрдэнэтэд сүлжээ хэлбэрээр дэлгэрээд улмаар цэцэглэчихэж.

Үүнийг аймгийн удирдлага хүлээн зөвшөөрлөө. Ер нь Баян-Өндөр сумаас худалдаа үйлчилгээтэй холбоотой ямар зөвшөөрөл олгодог, иргэдэд ямар шаардлага тавьдаг, хэдий хэрийн бичиг цаас шаарддаг зэргийг нийтэд ил болгох, мэдээлэх цаг болжээ. Танил талтай, нам эвсэл дагасан, мөнгө хөрөнгөтэй нөхдүүд Баян-Өндөр сумаас авсан тамхины худалдааны ганц зөвшөөрлөө гурав болгон үржүүлж тамхины худалдааг сүлжээ хэлбэрт оруулж монопольчилж байгааг хууль хяналтын байгууллагынхан харах ёстой. Гэр хорооолол өгсөн зам дагуух тамхины худалдааны цэгийг тоолбол багагүй тоо гарна. Эндээс харвал Баян-Өндөр сумын удирдлага өсвөр залуу үеийг тамхинд оруулах, донтуулахад хувь нэмрээ оруулж тамхины худалдааг дэмжээд байна уу гэсэн асуулт гарч ирнэ. Ямар ч байсан аймгийн Засаг дарга С.Батжаргал асуудлыг гаргаж тавилаа. Ямар ажил хийж, хэрхэхийг нь эрдэнэтчүүд харах л үлдлээ.