Шилэн дансны хууль тогтоомжийн хэрэгжилтийн талаар Аймгийн Санхүүгийн хяналт, аудитийн албаны дарга Ц.Алтанхуягтай хийсэн ярилцлагыг хүргэе. -Аймгийн хэмжээнд Шилэн дансны хууль тогтоомжийн хэрэгжилтийн дагуу шалгалт хийсэн. Энэ шалгалтын зорилго нь юу вэ. Хамрах хүрээ нь ямар байв? -. Монгол Улсын Ерөнхийлөгчийн санаачилгаар Шилэн дансны хууль тогтоомж 2015 оны нэгдүгээр сараас хэрэгжиж эхэлсэн. Жил бүр Засгийн газрын хуралдаанд Шилэн дансны хууль тогтоомжийн тайлан мэдээг оруулж хэлэлцдэг. Мөн 2016 онд улирал тутам аудит хийж, дүн мэдээг Засгийн газарт хүргүүлэх шийдвэр гаргасан. Үүнтэй холбоотой манай байгууллагаас аймгийн аудит, тайлан мэдээг гаргах зорилготой шалгалт хийлээ. Орон нутгийн төсвийн байгууллага болон сургууль, цэцэрлэг, эмнэлгүүд аудитад хамрагдсан. -Сангийн яамны зарим нэг мэдээ, аймгийн ЗДТГ-ын Шилэн дансны мэдээлэлд манай аймаг багагүй ажил хийсэн байдаг. Улсын хэмжээнд харьцуулахад манай аймагт Шилэн дансны хуулийн хэрэгжилт ямар байна вэ? -Шилэн дансны хууль тогтоомжийн хэрэгжилтийг төсөв гүйцэтгэл, тендер худалдан авалт, бусад гэсэн үндсэн гурван үзүүлэлтээр дүгнэдэг. Үүнд 20 орчим үзүүлэлтийг тухайн заасан хугацаанд долоо хоног, сар, улирал, жилээр нь мэдээлэл оруулах ёстой. Хууль тогтоомжийн хэрэгжилт 90 гаруй хувьтай, энэ үзүүлэлтээр манай аймаг улсын хэмжээнд эхний тавд орж байна. -Шалгалтаар илэрсэн нийтлэг зөрчил дутагдал юу байв. Шилэн данс хөтөлдөггүй албан байгууллага бий юу? -Манай аймагт шилэн данс хөтөлдөггүй байгууллага байхгүй. “Эрдэнэт үйлдвэр” манай хяналт тавих харьяа байгууллага биш учраас тодорхой мэдээлэлгүй байна. Илэрсэн дийлэнх зөрчлийг дурьдвал нягтлан бодогчийн ур чадвар, ажлын дадлаас шалтгаалж мэдээллээ хоцорч тавих, дутуу алдаатай мэдээллийг засалгүй оруулсан зэрэг зөрчил мэр сэр гарсан. -Шилэн дансны тайлан мэдээг өмнө нь нэг байгууллага хийдэг байсан. Одоо байгууллагууд өөрсдөө Яаманд илгээдэг болсон. Энэ талаар танайд сургалт зохион байгууллаа. Сургалтын талаар тодруулбал? -Өнгөрсөн хоёр жилийн турш сургалт явуулсан. Алдаа гаргасан нягтлан бодогч нарт сургалт явуулж байна. Өмнө нь байгууллагуудад Шилэн дансны хууль тогтоомжийг хэрэгжүүлэх үүрэг даалгавар өгөөд орхидог байсан. Энэ үеэр ажилтнууд чиг үүргээ мэдэхгүйгээс ажил тасалдах тохиодол гарч байсан. Иймд ажилтан бүрийн үүрэгт ажлыг тодорхой болгож, хөдөлмөрийн гэрээ, ажлын байрны тодорхойлолтонд тусгаж өгөхөөр өөрчилсөн. Энэ нь ажилчдын хариуцлагыг нэмэгдүүлж, үр дүнгээ өгч эхэлсэн. Мөн байгууллагын админ болон нягтлан бодогч нарт зориулсан гарын авлагыг бүх байгууллагаар тараан өгч байна. -Шилэн дансны нэгдсэн цахим хуудаснаас иргэд сонирхсон мэдээллээ авах боломжтой болсон. Энэ талаар мэдээлэл өгнө үү? - Тийм ээ. Shilendans.gov.mn гэсэн цахим хуудас руу ороход иргэдийн зүгээс төрийн болон зарим ТББ-ын төсөв санхүүтэй холбоотой мэдээллийг авах боломжтой. Аймаг, сумаа сонгосны дараа байгууллагаа сонгоно. Төсөв гүйцэтгэл, тендер худалдан авалт, бусад гэсэн үзүүлэлт рүү орж шалгана. Хэрхэн ашиглах талаар бид “Еrdenetnews.mn” сайтад зөвлөмж, зааврыг оруулж өгсөн. -Аймгийн Засаг даргын албан даалгаварт төсвийн хэмнэлттэй холбоотой мэдээлэл гарсан. Энэ талаар тодруулна уу? -Аймгийн ИТХ-аас эдийн засгийн хүндрэлийг даван туулах тогтоол гарсан байдаг. Үүний дагуу Аймгийн Засаг дарга хэмнэлтийн горимд шилжих тухай “Албан даалгавар” гаргасан. “Албан даалгавар”-ын хүрээнд 10 гаруй заалттай төлөвлөгөө гарч ажил нь хэрэгжиж байна. Энэ сараас “Төсвийн бодлого, ИТХ-ын хяналт” сэдэвтэй аян эхэлсэн. Энэ хүрээнд орон нутгийн төсвийн байгууллага, сургууль, цэцэрлэг, эмнэлэгт шалгалт хийхээр ажлын хэсэг ажиллаж байна. Шалгалтын талаарх мэдээллийг бид иргэддээ хүргэх болно. Ц.Ариунчимэг [sgmb id="1"]