Төрийн амин чухал үүрэг нь иргэдийнхээ үгийг сонсож, хүсэлтийг нь биелүүлэхийн төлөө ажиллах. Энэ үүргээ аймгийн Засаг дарга Б.Зоригтбаяр уг албанд ирсэнээсээ хойш биелүүлэхийг хичээж байгаа нь сайшаалтай. Орхон аймгийг удирдаж яваа түүний хувьд долоо хоног бүр иргэдээ хүлээн авч, биечлэн уулздаг. Сүүлийн долоо хоногуудад иргэдээс хэлсэн санал, “Иргэдийн санал хүсэлтийг хүлээн авах 7035-3511 утас”-нд ирүүлсэн санал хүсэлтийг хэрхэн барагдуулж байгаа талаарх мэдээллийг хүргэж байна.

Аймгийн Засаг дарга долоо хоног бүрийн пүрэв гарагт иргэдийг хүлээн авч уулзан санал хүсэлтийг нь сонсохын зэрэгцээ зарим байршилд холбогдох албаныхны хамтаар биечлэн ажилладаг. Өнгөрсөн наймдугаар сарын 7, 21-нд 31 иргэнийг биечлэн хүлээн авч уулзан, иргэдээс гарсан 39 санал хүсэлтийг холбогдох хэлтэс, байгууллагад үүрэг даалгавар болгон өгсөн.

Тэдгээрээс 100 хувийн биелэлттэй 25 үүрэг даалгавар, 60 хувийн биелэлттэй 2, 50 хувийн биелэлттэй  нэг, 30 хувийн биелэлттэй дөрөв, 10 хувийн биелэлттэй нэг, хангалттгүй биелэлттэй зургаан үүрэг даалгавар байна.  

Агуулгаар нь авч үзвэл дэмжлэг, тусламж хүссэн дөрөв, гэр хүссэн дөрөв, инженерийн шугам сүлжээний асуудлаар дөрөв, газрын харилцаатай холбоотой асуудлаар дөрөв, бусад асуудлаар 13 гэхчлэн байна.

Иргэдийн санал хүсэлт хүлээн авах “70353511 утас”-аар ирсэн 14 хоногийн мэдээлэл

“ББ ПАРК ХОТХОН”-Ы АЖЛЫГ БАТЛАГДСАН ТӨСВИЙН ДАГУУ ХИЙЖ БАЙНА

-Иргэний хүсэлт: “ББ парк хотхон”-ы авто замын ажил стандартын дагуу хийгдэж байгаад хяналт тавьж ажиллана уу.

-Шийдвэрлэсэн: ХЗА, Захиалагчийн техник хяналтын тасаг, А.Эрдэнэбат:

-“ББ парк хотхон”-ын авто зам барилгын ажил магадлалаар батлагдсан зураг төсөв стандартын дагуу хийгдэж байгаа. Мөн ус зайлуулах хоолой гурван байршилд нийт 39 м урттай хийгдсэн. Үерийн усны шуудуу хийгдэх талаар иргэнтэй холбогдож мэдээлэл өгсөн.

“ГРАНД ГАРДЕН ХОТХОН”-Ы АВТО ЗАМ БЕТОНОН ХУЧИЛТАА АВНА

Иргэний санал: “Гранд гарден хотхон”-ы авто замын ажил удааширалтай явагдаж байгааг эрчимжүүлнэ үү.

Шийдвэрлэсэн: ХЗА, Захиалагчийн техник хяналтын тасаг, Н.Хонгорзул: 2А хорооллын авто замын ажил 2025 оны наймдугаар сарын 31-ний өдөр хоолойн буцаан дүүргэлтээ хийж дуусган, иргэдийг төв замтай шууд холбогдох хэсгээр нэвтрүүлэхээр төлөвлөж байгаа. Асфальтбетон хучилтаа есдүгээр сард авах талаар иргэнд мэдээлэл өгсөн.

“ТАНИЛ ЗАХ”-ЫН АВТО ЗАМЫН АЖЛЫГ ЭНЭ ОНД ДУУСГАХ ҮҮРЭГ ӨГСӨН

Иргэний хүсэлт: “Танил зах” хэсгийн авто замын ажлыг эрчимжүүлж өгнө үү.

Шийдвэрлэсэн: ХЗА, Захиалагчийн техник хяналтын тасаг, А.Эрдэнэбат: “Танил зах” хэсгийн авто замын сүлжээний замын барилгын ажилд тулгарч байсан инженерийн шугам сүлжээ болон бусад асуудлууд шийдэгдсэн. Гүйцэтгэгчид 2025 онд багтааж “Танил зах” хэсгийн авто замын сүлжээний ажлыг дуусган хүлээлгэж өгөх үүрэг даалгавар өгсөн тухай мэдээллийг иргэнд мэдэгдсэн.