Аймгийн Хүнс, хөдөө аж ахуйн газраас шуурхай зөвлөгөөний үеэр мэдээлэл хийж цэцэг өвчний хорио цээрийн дэглэм буурсан, хяналтын постуудыг татан буулгасан тухай мэдээлсэн. Аймгийн хэмжээний нийт хонин толгойг гуравдугаар сарын дунд гэхэд вакцинд хамруулахаар болсон. Мөн салбарын яамнаас улсын сайн малчин, тариаланч, тариаланч хамт олон шалгаруулдаг болзолд өөрчлөлт хийснийг саяхан танилцуулсан. Тун удахгүй манай аймаг шилдгүүдээ шалгаруулж улсад материалаа явуулах тул Баян-Өндөр, Жаргалант сумын удирдлага энэ тал дээр анхаарлаа хандуулна уу гэлээ. Мөн ойрын үед аймгийн Хүнс, хөдөө аж ахуйн газраас Жаргалантын долоо, Баян-Өндөр сумын дөрвөн чиглэлд ажлын хэсэг гарч ажиллах болсон тухай дуулгав. Түүний мэдээллийн дараа аймгийн ЗДТГ-ын дарга Г.Соёлчхүү “Ямар учраас хяналтын постыг татан буулгав. Хонины цэцэг өвчин хүнд халдах уу. Хонио бүрэн вакцинжуулаагүй байж постыг татан буулгаж болж байгаа юм уу. Ийм тохиолдол байна уу” хэмээн асууж тодруулсан. ХХААГ-ын дарга Г.Бат-Өлзий “Хонины цэцэг өвчин гарсан Сэлэнгэ аймгийн Орхонтуул, Дархан-Уул аймгийн Хонгор, Булган аймгийн Могод, Гурванбулаг, Орхон суманд гарсан хяналтын постыг татан буулгасан байсан. Өвчний голомтот өрхүүдийн хонийг вакцинжуулсан. Түүнээс хойш танадалтын 14 хоногийн хугацаанд нэмж өвчин илрээгүй зэрэг байдлыг харгалзан үзээд постыг татан буулгасан. Хонины цэцэг өвчин хүнд халдварласан тохиолдол одоогоор гараагүй. Харин өвчний нян хүйтэнд маш тэсвэртэй, халуунд тэсвэргүй байдаг. Цэцэг өвчний нян 14 хоног нуугдмал үедээ байдаг. Энэ хугацаанд өвчилсөн малын махыг иргэд хүнсэндээ хэрэглэх аюултай тул хяналтын пост ажиллуулдаг” гэсэн хариулт өгсөн юм. [sgmb id="1"]