Баян-Өндөр сумын ИТХ-ын ээлжит гуравдугаар хуралдаан мягмар гарагт боллоо. Энэ удаагийн сумын ИТХ-ын хуралдаанаар Баян-Өндөр сумын 2017 оны төсөв, Орон нутгийн хөгжлийн сангийн хөрөнгөөр хийгдэх ажлын жагсаалт хэвлэлийнхэний анхаарлыг ихээхэн татсан юм. Өмнөх хуралдаанаар сумын Засаг даргын мөрийн хөтөлбөрийг баталж түүнийг хэрэгжүүлэх 2017 оны Үндсэн чиглэлийг, хөрөнгө мөнгөнийнх нь хамт хэлэлцсэн энэхүү хуралдаанд сумын ИТХ дахь МАН, АН-ын бүлгүүд ч ихээхэн анхаарал хандуулж, ач холбогдол өгч байлаа. Сумын Засаг даргаас энэ удаад “ЗДТГ-ыг малтай болгож малжуулахад 10 сая төгрөг”, “Сумын ЗДТГ-т студи байгуулахад 30 сая төгрөг”, “Сумын ЗДТГ-ын байрны дэргэд спорт заал барихад хөрөнгө суулгах” зэрэг олон ажил хийхээр оруулж ирсэнд АН-ын бүлгээс нэлээд шүүмжлэлтэй хандаж, харин иргэнд чиглэсэн өрхийн эрүүл мэндийн төв болоод Орхон аймагт нэн шаардлагатай эмнэлгийн тоног төхөөрөмж худалдан авах, наймдугаар сургуулийн спорт заалны хүүхдийн хувцас сольдог өрөөний засварт шаардлагатай 3-10 сая төгрөгийн хөрөнгө оруулалтыг суулгаж өгөхийг хүсч, шаардаж байлаа. Сумын Засаг дарга С.Ганцогт “Үнэнийг хэлэхэд Баян-Өндөр сумын Засаг дарга, ИТХ-ын даргын зүгээс түүхэндээ анх удаа 31 төлөөлөгчийнхөө нийтлэг эрх ашгийг харгалзаж үзсэн төсвийг анх удаа оруулж ирж байгаа. Би өмнө нь сумын ИТХ-ын төлөөлөгчөөр дөрвөн жил ажилласан. Хөрөнгөгүй гарч ирсэн удаа олон бий. Харин энэ удаад та бүхний санал хүсэлтийг тусгасан. Байнгын хороогоор анхан шатнаас нь судлуулан оруулж ирсэн төсөв болсон гэдгийг хэлье. Иргэдийг хүлээж авах, тохижилтын төсөв гэж тусгагдсан. Сумын байраар орж ирэхэд хүний нүдэнд аятайхан харагдуулах, засаж сайжруулахад зориулахаар оруулсан. Хоёрдугаарт, Наран багийн ахмадын байр гэж бий. Дотор засал чимэглэлийг нь аятайхан хийгээд зориулалтаар нь авч явахад шаардлагатай хөрөнгө гэж суулгасан. Сүүлийн гурван жил хөрөнгө оруулалт хүссэн санал ирүүлсэн. Юу ч хийгээгүй. Одоо үүнд зориулж төлөөлөгчдийн гаргасан саналыг эрэмбэлж, Наран багийн иргэдийн саналын дагуу засч янзална. Үүний дараа баг нь өөрөө хариуцаад авч явна. Гуравдугаарт, манай суманд нэг хүндрэлтэй байгаа асуудал нь ил задгай худалдаа эрхлэлт, хотын өнгө зүс байна. Уурхайчин багийн Худалдааны гудамж гэгчийг байгуулсан. Их хөрөнгө мөнгө гарсан. Үүнийг ашиглах хэрэгтэй. Гудамжинд хүний урсгалыг бий болгож, худалдааг төвлөрүүлэх зорилгоор хэд хэдэн явуулын ТҮЦ байгуулна. Өнгө үзэмж сайтай, ийш тийш нь аваад явчих боломжтой худалдаагаа хийдэг зөөврийн ТҮЦ машинд 20 сая төгрөг зарцуулахаар төлөвлөсөн. Баян-Өндөр сумын ЗДТГ-тай холбоотой хамаатай, тэнд ажилладаг 150 иргэн байдаг. Тогтсон цалин хөлс гэж байдаггүй. Урамшуулал л авдаг хүмүүс байдаг. Тэдэнд шагнал гэж байдаггүй. Энэ бүхнээс үүдээд сум өөрийн мал аж ахуйтай болох зайлшгүй шаардлагатай гэж үзээд 10 сая төгрөгөөр мал худалдан авна. Баян-Өндөр сумын Иргэний танхим, багуудын иргэний танхимд хөрөнгө мөнгө суулгасан. Өмнө нь үүнийг байгуулж тохижуулсан, одоо тоног төхөөрөмж шаардлагатай байгаа. Үүнд хөрөнгө мөнгө суулгасан. Сумын ИТХ-аас гаргасан бодого шийдвэрийг иргэдэд хүргэхийн тулд иргэний танхимд зориулж 20 сая, Баян-Өндөр сумын ЗДТГ-т студи байгуулахын тулд 30 сая төгрөг суулгасан. Ингэснээр та бүхэн ажлаа сурталчлахад дөхөмжтэй болно. Мөн сургууль, цэцэрлэгээс маш их хүсэлт ирсэн. Судалж үзээд, эрэмблээд эхний ээлжинд нэр дурдсан газруудад тодорхой хэмжээний хөрөнгө мөнгө суулгасан. Төсвийн тодотгол хийсэн үед, ирэх он жилүүдэд ээлж дараагаар асуудлыг нь шийднэ. Наймдугаар сургуулийн заалны тохижилт орсон байсан. Судалж үзээд энэ нь өнөөдөртөө яаралтай биш, дараа шийдье гээд “Орхон” цогцолбор сургууль, зургаадугаар цэцэрлэгт хөрөнгө, мөнгө суулгасан. Рашаант багт 10 сая төгрөгөөр хог ангилан ялгах савны асуудал орж ирсэн. Уурхайчин багт хогоо гурав ялгаж хийдэг, хоёдогч түүхий эдийг ялгах хогийн савыг байрлуулахаар хөрөнгө суулгасан. Цагаанчулуут багт хогны сав өгөх мөнгө суулгасан. Эрдэнэт үйлдвэрээс 2200 төгрөгөөр хорны сав гардаг. Дотоод журмаар зарагддаг эд л дээ. “Эрдмин” ХХК-иас 400, “Ачит их” компаниас 3000 поошиг авч айл өрхүүдэд буюу гэр хорооллын багт хогны сав болгож тараахад 10 сая төгрөг тусгасан. Яваандаа гэр хороллын айл өрхүүдийг ийм хогны савтай болгоно” гэлээ. Г.Ганзориг: Хүний эрүүл мэнд малжуулах 10 сая төгрөгнөөс үнэгүй болсон уу                Рашаант багаас сонгогдсон төлөөлөгч Г.Ганзориг “ Зарим хөрөнгө мөнгийг тодорхой болгох үүднээс нэршил, байршлыг нь тодорхой заах хэрэгтэй байна. Наран, Булаг, Рашаант, Цагаанчулуут, Уртын гол багийн иргэд үйлчлүүлдэг “Үйлс бадрах” өрхийн эмнэлэгт 3.5 сая төгрөг тоног төхөөрөмж худалдан авах гэж тавьжээ. Өрхийн эмнэлэгт пульс хэмжигч багаж, эхо аппарат хэрэгтэй. Энэ мөнгө хаанаа ч хүрэхгүй. Мөн зүрхний хэм үздэг аппарат эмч нарт хэрэгтэй байна. Та бүхэн кинон дээрээс харсан, зүрний цохилтыг нэмэгдүүлэх гэж эмч гартаа хоёр юм барьж байгаад тогоор цохиулдаг. Энэ аппарат 4.5 сая төгрөгийн үнэтэй. Үүнийг авах хөрөнгийг шийдэж өгөөч. Өнөөдөр Эрдэнэтэд ийм аппарат “Медипас”-т л байдаг. Таван багийн 20 мянган иргэний эрүүл мэндийг дэмжихэд хэрэгтэй энэ аппаратны мөнгийг суулгаж өгөөч. ЗДТГ, Засаг дарга малтай болох гэж байна. Малаас чинь илүү хүний эрүүл мэнд, амь нас чухал байх. Мал худалдан авч малжуулахыг буруу гэхгүй байна. Төсвийн тодотголоор дахиад хөрөнгө мөнгийг нь оруулчих. Түүнийхээ оронд хүний амь нас, эрүүл мэндтэй холбоотой аппартны 4.5 сая төгрөгийг нэмээд суулгуулах горимын санал гаргаж байна. Наймдугаар сургуулийн спорт заалны хувцас сольдог өрөөний засварын 10 сая төгрөгийг иргэний танхимын хөрөнгөнөөс шийдчих боломж байна. Ийм санал гаргаж байна, санал хураалт явуулж өгөөч. Өнөөдөр бидэнд мал худалдаж авахаас илүүтэй хүний амь настай холбоотой асуудалд хөрөнгө мөнгөө илүү тусгамаар байна” гэсэн санал гаргаж байлаа. Гэвч сумын ИТХ-ын олонхийг бүрдүүлдэг МАН-ын бүлгийн зүгээс асуудалд олонхиор түрий барьж хандаж байлаа. Цөөнх болох АН-ын бүлгийн гишүүн Г.Ганзориг, О.Мөнх-Од нарын гаргасан санал дээр төлөөлөгчдийн дунд санал хураалт явуулалгүйгээр шууд өөрсдийн гаргасан “Төслийг бүхлээр нь батлах санал” гэдэгтээ санал хураалт явуулж асуудлыг шийдэж байгаа нь сумын ИТХ-д дахь МАН-ын бүлгийн гишүүдийн хувьд хүний эрүүл мэндийг малтай болохоос дорд үзэж байгаа хэрэг гэж ойлгоход хүрч байлаа. Хэвлэлийнхэн аймаг, сумын ИТХ-ын хуралдаанд сууж түүнийхээ талаар мэдээ, мэдээлэл хийдэг. Энэ удаагийн сумын ИТХ-ын хуралдаанаас харвал олонхийн бүлэг цөөнхийн гаргасан санал, тэр дундаа горимын санал дээр ч санал хураалт явуулахгүй асуудлыг олонхиор шийдэж байгаа нь хэтэрхий ааг бярандаа итгэсэн залуу бөхийн шинж харагдаад байх шиг. Аймгийн ИТХ-ын хуралдаанаас ажвал цөөнх гэлтгүй төлөөлөгчдийн гаргасан санал бүрийг Редакцийн комисс тэмдэглэж аваад тус бүр дээр нь санал хураалгадаг зарчмаар асуудалд хандаж явдаг. Гэтэл сумын ИТХ олны хүчээр бусдыгаа сонсолгүй ганцхан “Оруулж ирсэн төслийг нь дэмжих” гэдгээр санал хураалт явуулж, нэгэн дуугаар ярс хийтэл гар өргөж буйгаас харвал ардчилсан орны парламентат жишигт бүрнээ нийцээгүй харин ч хойд Солонгос, коммунист намтай орнуудын хуралд сууж байгаа мэт сэтгэгдлийг бусдад төрүүлж байлаа. Энэ байдлаас нь харвал АН-ын төлөөлөгчдөд саналаа өгсөн Оюут, Уртбулаг багийн нийт иргэд, Хүрэнбулаг, Рашаант багийн зарим сонгогчид сумын МАН-ын зүгээс, сумын ИТХ-ын зүгээс 2020 он хүртэл нар харахгүй, тэд ч нар харуулахгүй байж мэдэх нь. Хэдийгээр сумын ИТХ-аас асуудлыг эрэмблэж, ээлж дараагаар шийднэ гэж байгаа ч шийдэх асуудал олон, эрх барих хугацаа дөрөвхөн жил гэдгийг бодолцохгүй бол сайн дүр зураг харагдаж өгөхгүй байна. Аяганы алагаас адууны алаг нь дээр гэдэг үгийг монголчууд зүгээр ч нэг хэлдэггүй дээ. [sgmb id="1"]