Монгол улсын Засгийн газрын 9 тоот тогтоол гарчаймгийн ЗДТГ-ын бүтцийг шинэчлэн баталсан байна. Энэхүү тогтоолоос харвал аймгийн удирдлага нь аймгийн Засаг дарга, аймгийн Засаг даргын орлогч, ЗДТГ-ын дарга байхаар тогтоожээ. Аймгийн ЗДТГ-ын бүтцийг дараахь байдлаар баталсан байна. -Төрийн захиргааны удирдлагын хэлтэс -Хууль, эрх зүйн хэлтэс |архивын тасагтай| -Хөрөнгө оруулалт, хөгжлийн бодлого, төлөвлөлтийн хэлтэс -Нийгмийн бодлогын хэлтэс -Санхүү, төрийн сангийн хэлтэс -Хяналт шинжилгээ, үнэлгээ, дотоод аудитын хэлтэс -Цэргийн штаб гэсэн долоон хэлтэстэй байх аж. Мөн дээрх тогтоолоор орон нутгийн онцлог, нутаг дэвсгэрийн хэмжээ, хүн амын тоо, эдийн засаг, үйлдвэрлэлийн цар хүрээнээс хамааруулан Архангай, Баянхонгор, Баян-Өлгий, Говь-Алтай, Дархан-Уул, Орхон, Дорнод, Завхан, Өвөрхангай, Сэлэнгэ, Төв, Увс, Ховд, Хөвсгөл аймгийн ЗДТГ-ыг 41 хүртэл, Булган, Дорноговь, Дундговь, Өмнөговь, Сүхбаатар, Хэнтийаймгийн ЗДТГ-ыг 37 хүртэл, Говьсүмбэр аймгийн ЗДТГ-ыг 29 хүртэл орон тоотой байхаар баталсан байна. Аймгийн Засаг даргын эрхлэх асуудлын хүрээнд: -Байгаль орчин, аялал жуулчлалын газар -Биеийн тамир, спортын газар -Боловсрол, соёл, урлагийн газар -Гаалийн алба -Газрын харилцаа, барилга, хот байгуулалтын газар -Гэр бүл, хүүхэд, залуучуудын хөгжлийн газар -Мэргэжлийн хяналтын газар -Онцгой байдлын хэлтэс \газар\ -Орон нутгийн өмчийн газар \Худалдан авах ажиллагааны албатай\ -Санхүүгийн хяналт, аудитын алба -Стандарт, хэмжил зүйн хэлтэс -Статистикийн хэлтэс -Татварын хэлтэс -Улсын бүртгэлийн хэлтэс -Ус, цаг уур, орчны шинжилгээний алба -Хөдөлмөр, халамжийн үйлчилгээний газар -Хүнс, хөдөө аж ахуйн газар -Цагдаагийн хэлтэс, \газар\ -Шүүхийн шийдвэр гүйцэтгэх алба -Шүүхийн шинжилгээний алба -Эрүүл мэндийн газар \Зоонозын өвчин судлалын албатай\ -Эрүүл мэнд, нийгмийн даатгалын хэлтэс гэсэн 22 агентлаг ажиллах аж.  Ийнхүү Засгийн газраас аймгийн ЗДТГ-ын бүтэц, засаг даргын эрхлэх асуудлын хүрээнд ажиллах хэрэгжүүлэгч агентлагийн нэрийг баталж чиг, үүргийг нь гаргаж өгснөөр аймгийн Засаг дарга Д.Батлутын хувьд бүрэн эрхээ хэрэгжүүлэх боломж нээлттэй болж байгаа юм. Аймгийн ЗДТГ-ын хэлтсийн бүтцээс харвал хяналт шинжилгээ, үнэлгээний алба нь хэлтэс болон өргөжжээ.  Аймгийн Засаг дарга Д.Батлутын хувьд ЗДТГ-ын зургаан хэлтсийн даргыг бүтцийн өөрчлөлтийн дагуу өөрчлөх болов уу. Тэр дундаа хуучнаар Хууль зүйн хэлтсийн дарга М.Мөнхбаяр, Хөгжлийн бодлогын хэлтсийн дарга Д.Батдэлгэр, Санхүү, төрийн сангийн хэлтсийн дарга Д.Мөнх-Эрдэнэ нарыг хамгийн түрүүнд өөрчлөх тухай  Нутгийн удирдлагын ордон дотор шуугиж байна. Дээр нь Цэргийн штабын дарга С.Батсуурийг ч өөрчлөх аж. Түүний томилолтын хугацаа аль хэдийнэ дууссан учраас Батлан хамгаалахын сайдтай зөвшилцсөний дагуу түүнийг өөрчлөх байх. Харин Засаг даргын эрхлэх асуудлын хүрээнд ажиллах 22 агентлагийн Байгаль орчин, аялал жуулчлалын газар, Биеийн тамир, спортын газар, Боловсрол, соёл, урлагийн газар, Газрын харилцаа, барилга, хот байгуулалтын газар, гэр бүл, хүүхэд, залуучуудын хөгжлийн газар, Орон нутгийн өмчийн газар \Худалдан авах ажиллагааны албатай\, Санхүүгийн хяналт, аудитын алба, Стандарт, хэмжил зүйн хэлтэс, Эрүүл мэндийн газар \Зоонозын өвчин судлалын албатай\-ын даргын бүрэн эрхийнхээ хүрээнд шууд өөрчлөх эрхтэй. Харин үлдсэн 13 агентлагын удирдлагыг эрхлэх сайдтай нь зөвшилцсөний үндсэн дээр өөрчлөх эрхтэй ажээ. Аймгийн ЗДТГ-ын бүтэц бүрэлдэхүүн, Засаг даргын эрхлэх асуудлын хүрээнд ажиллах агентлагын нэр, бүтцийг баталсан Засгийн газрын 9 тоот тогтоол гарсан даруй МАН-ын боловсон хүчнүүд ажил, албан тушаалд очихоор шамдаж, эхнээсээ Нутгийн удирдлагийн ордон хавиар эргэлдэж эхэлжээ.