Орхон аймгийн Иргэдийг гэмт халдлагаас хамгаалах Монголын нийгэмлэг /ИГХХМН/-ийн төвийн бүсийн салбар “Их-Уул” төвийн олон нийтийн байцаагчид иргэдийнхээ төлөө ажилласан хагас жилийнхээ тайланг саяхан тавьжээ. ИГХХМН-ийн төвийн бүсийн салбар зөвлөлийн олон нийтийн 8 байцаагч 2015 онд Орхон аймгийн Засаг даргын 2012-2016 онд хэрэгжүүлж байгаа мөрийн хөтөлбөрийн хэрэгжилтэнд дэмжлэг үзүүлэх чиглэлээр Засаг даргатай 2015 оны 03-р сарын 10-нд хийсэн хамтран ажиллах гэрээ байгуулсан аж.Мөн аймгийн Засаг даргын А/524 захирамжийн хэрэгжилтийг хангах, судлах, сурталчилах, нийтийн тээврээр үйлчлүүлж байгаа зорчигч иргэдийн эрх ашгийг хамгаалах, чанар аюулгүй байдлыг хангах, нийтийн эзэмшлийн эд хогшлыг эвдэж гэмтээх, хог хаягдлыг ил задгай асгах, байгаль орчин, ногоон байгууламжийг бохирдуулахгүй байх зэрэг чиглэлээр төрөөс явуулж байгаа ажлын зарим чиг үүргийг Монгол улсын холбогдох хууль дүрэм журмуудын хүрээнд гүйцэтгэж ирлээ. “Их-Уул”-ын байцаагчид үндсэн 3 чиглэлээр 2 ээлжээр тогтмол эргүүлд гарч Баян-Өндөр сумын ЗДТГ, ЗЦТ, ТАЗГ зэрэг төрийн хяналтын болон үйлчилгээний албадтай гэрээ байгуулан хамтран ажилласны хүчинд ажлын үр дүн сайн байгааг иргэд, олон нийтийн байгууллагууд ч үнэлсэн байдаг юм. Улсын баяр наадмын өдрүүдээр 7 хоног наадмын талбай, морь барианы газруудад 2 машинтай байцаагч 24 цагаар эргүүлд гарч Цагдаагийн газар, Баян-Өндөр сум зэрэг байгууллагуудтай хамтран ажилласан байна. Энэ ажлыг баяр наадмын комисс үнэлж зарим хүмүүсийг шагнаж урамшуулсан ажээ.Тус төвийнхөн орон нутгийн болон улсын чанартай зарим авто замын чиглэлийн дагуу такси, нийтийн тээврийн микро автобуснуудын дунд хулгайн тээвэр газар авч байгаа, таксины тусгай зөвшөөрөл, таних тэмдэггүй хувийн машинтай жолооч нар хулгайгаар хүн тээвэрлэж байгаа зэрэг зөрчлүүдийг таслан зогсоох чиглэлээр багагүй ажил хийжээ. Тухайлбал, 2015 оны зургаадугаар сарын 1-26-ны хооронд тус салбар зөвлөлийн олон нийтийн байцаагчид аймгийн хэмжээнд 425 машинд шалгалт хийжээ. Тэдгээрийн 275 нь хууль бусаар хүн тээвэр хийсэн машин байна. Мөн дээрх машинуудаас 25 микро автобус техникийн шаардлага хангаагүй ашиглалтын хугацаа хэтэрсэн шалтгаанаар нийтийн тээврийн үйлчилгээнээс хасагдсан ч хүн тээвэр хийж байжээ. Үзлэг оношлогоонд ороогүй 32 машин байсныг холбогдох байгууллага болох Орхон аймгийн авто тээврийн төв, Замын цагдаагийн тасагт мэдэгдэж оношлогоонд хамруулсан байна. Шалгалт явагдаж байх үеэр олон нийтийн байцаагчдын тавьсан шаардлагыг биелүүлэхээс татгалзсан, бичиг баримт шалгуулалгүй зугатсан 16 жолоочийн асуудлыг холбогдох байгууллагад нь тавьж шийдвэрлүүлсэн байна. Шалгалтын явцад 4 жолооч хэвтээ тэнхлэг зөрчин эргэлт хийсэн тохиолдлыг бүртгэж тодорхой арга хэмжээ авчээ. Олон нийтийн байцаагчдийн хувьд бичил хороооллын дундах зөвшөөрөлгүй зогсоолууд дээрх такси үйлчилгээг хянахад багагүй анхаарлаа хандуулжээ. Хоёрдугаар бичил хорооллын 7 дугаар байрны зогсоолоос хууль бус хүн тээвэр хийж байсан 78 машинд сануулга өгчээ. Мөн 1-16 дугаар байрны зогсоол дээрх 47, 4-8 дугаар байрны зогсоолоос 5, 3-17 дугаар байрны зогсоолоос 13, хорооллын эцсийн зогсоолоос хууль бусаар хүн тээвэр хийсэн 22 машиныг саатуулан шалгаж анхааруулгаа, санамж өгсөн аж. Энэ үеэр олон нийтийн байцаагчдын тавьсан шаардлага биелүүлээгүй, хэл амаар доромжилсон 9 жолоочийг Замын цагдаагийн газрын хөдөлгөөнт эргүүлийн албаныханд хүлээлгэн өгсөн байна. Мөн шалгалтын хугацаанд “Буган орд” ХХК-ийн автобусны маршрутын дагуу ч тодорхой үзлэг, шалгалт хийжээ. Тус компани цагийн хуваарийн дагуу нийтийн тээврийн үйлчилгээнд 4-5 автобус гаргаж байв. Үүний хажуугаар автобусны үндсэн чиглэлийн дагуу хууль бус хүн тээвэр хийдэг зөрчил гарсаар байна. Шалгалтаар 117 хууль бус, албан ёсны зөвшөөрөлгүй авто тээврийн хэрэгсэл бүртгэгдсэнээс 196-д нь арга хэмжээ авч, зугатсан 8 машины улсын дугаарыг Замын цагдаа тасагт шилжүүлжээ. Орхон аймгийн ИГХХМН-ийн төвийн бүсийн салбар зөвлөлийн олон нийтийн байцаагч нараас Х.Батжаргал, Д.Оюунцэцэг, Х.Нямсүрэн нар ажилдаа идэвх санаачлагатай ажилладаг ажээ. Гэвч тэдний хийж буй ажлыг хулгайн тээвэр эрхэлдэг такси болон нийтийн тээвэрт хулгайгаар хүн тээвэрлэдэг жолооч нар ойлгодоггүй хэл амаар доромжлох зарим тохиолдолд тавьсан шаардлагыг нь биелүүлдэггүй эрх чөлөөнд нь халдаг ч тохиолдол гардаг талаар тус зөвлөлийнхөн төдийгүй иргэд ч холбогдох байгууллагад нь мэдэгддэг ажээ. Тус салбар зөвлөлийн ажил тодорхой зорилготой байж түүнийхээ хэрээр үр дүнтэй байсан, төрийн ажлын зарим чиг үүргийг хувийн хэвшил, төрийн бус байгууллагаар хийлгэхэд ач холбогдол гарч үр дүнд хүрч байгаа учраас Орхон аймгийн Авто тээврийн төвөөс аймгийн Засаг даргын Тамгын газарт ч тэдний ажлыг цаашид үргэлжлүүлэхийг хүссэн албан бичиг хүргүүлсэн зэргээс харвал салбар зөвлөлийн олон нийтийн байцаагчид хийсэн ажилтай, хэлэх үгтэй байна. “Их-Уул”-ынхантай орон нутагт авто тээврийн үйлчилгээ эрхэлдэг “Бб-Од”, “Буган Орд”, “Авто мастер” зэрэг компаниуд хамтран ажиллаж ирсэн нь Засаг даргын захирамж, Засаг даргатай байгуулсан гэрээ амьдрал дээр хэрэгжихэд ихээхэн нөлөө үзүүлсэн гэдгийг тэд онцолж байв. Хулгайн тээвэртэй тэмцэх ажил тогтмол хийгдэж үр дүн гарч байгаа боловч хотын тээврийн үндэсний төвийн авто тээврийн хяналтын улсын байцаагч нар хамтран ажиллах, дэмжлэг үзүүлэх тал дээр дутагдалтай байжээ. Дээрх ажлын хүрээнд Нийтийн тээврийн үйлчилгээтэй холбоотой захиргааны зөрчил гаргасан 872 тээврийн хэрэгсэл бүртгэгдэн шалгагдаж 611-д нь эдний байцаагчид өөрсдийн эрх үүргийн дагуу захиргааны арга хэмжээ авч нэг сая 444 төгрөгийнторгуулийн тавьсан байна. Өөрсдийн эрх хэмжээнээс хэтэрсэн арга хэмжээ авах шаардлагатай 63 тээврийн хэрэгслийг ЗЦТ, МХГ, Тээврийн үндэсний төвд шилжүүлсэн боловч зөрчилтэй зарим тээврийн хэрэгсэлд шаардлагатай арга хэмжээ аваагүй бөгөөд байжээ. Гэвч “Их-Уул” төвийнхөн хийсэн ажилтай, хэлэх үгтэйгээр энэ удаагийн тайлангаа тавьсан юм.