Үйлдвэрийн ерөнхий захирал Г.Ёндонгийн өнөөдөр “Баяжуулах үйлдвэрийн өөрөө нунтаглах хэсгийн хүчин чадлыг жилд 6 сая тонноор нэмэгдүүлэх шинэ 4-р шугамын өргөтгөлийн төслийн ажлыг хүлээн авах ёслол” дээр хэлсэн үгийг хүргэж байна. Түүний үг “Байгалийн баялгийг Баялгийн сангаар дамжуулан нийт ард түмэндээ хүртээж байх” гэсэн үгээр эхэлсэн нь анхаарал татахаар сонсогдлоо.

 Энэ үг сайн нягталвал, нийт ард түмэнд хүртээх байгалийн үр өгөөж “Эрдэнэт үйлдвэр”-т байна гэсэн том агуулга харагдаж байна. Улс, орон нутгийн эдийн засагт төлж буй татвараас гадна “Баялгийн сан”-гийн хуримтлалыг дан ганц энэ үйлдвэр бүрдүүлэхгүй нь ойлгомжтой. Г.Ёндон захирлын үгнээс харвал, хариуцлагатай хүний үг Засгийн газар “Баялгийн сан”-г амь оруулах гэж буй дохио гэж үзэхээр. Ковидын үед монголчуудын гэрэл цахилгааны төлбөрийг үйлдвэр даан төлж байсан. “Эрдэнэт үйлдвэр” маань сайн ажиллаж байна, өргөжин хөгжиж байгаад баярлахаас аргагүй.

“Эрдэнэт үйлдвэр” ТӨҮГ-ын ерөнхий захирал Г.Ёндонгийн хэлсэн үг:

-Эрдэнэтийн уурхайчид байгалийн баялгийг үр өгөөжтэйгээр баялгийн сангаар дамжуулан нийт ард түмэндээ хүртээх, төр засгийн бодлого шийдвэрийг хэрэгжүүлж, үйлдвэрийнхээ нийгэм, эдийн засагт оруулж буй хувь нэмрийг бууруулахгүй, улмаар нэмэгдүүлэх зорилго тавин ажиллаж байна.

Өнөөдөр бид Баяжуулах үйлдвэрийн өөрөө нунтаглах хэсгийн хүчин чадлыг жилд 6 сая тонноор нэмэгдүүлэх шинэ 4-р шугамын өргөтгөлийн төслийн ажлыг хүлээн авах ёслолын арга хэмжээ зохион байгуулж байна. Уурхайн уул геологийн нөхцөл жил ирэх тусам хүндэрч байгаагаас шалтгаалан баяжуулах үйлдвэрийн боловсруулж байгаа хүдэр дэх зэсийн агуулга, тухайлбал 2017-2022 онд 25 хувиар буурч, зэсийн баяжмал гаргах явц 30 мянган тонноор багассан. Иймд Засгийн газрын 2020-2024 оны Үйл ажиллагааны хөтөлбөрт “Эрдэнэт үйлдвэр”-ийг 2031 он хүртэл хөгжүүлэх Үндсэн чиглэлд Баяжуулах үйлдвэрийн хүчин чадлыг 40 сая тоннд хүргэх, зэсийн баяжмал гаргалтыг тогтвортой барих зорилт тавин ажиллахаар дэвшүүлсэн. Дэвшүүлсэн зорилтдоо хүрэхийн тулд эхний ээлжинд Баяжуулах үйлдвэрийн Өөрөө нунтаглах хэсгийн хүчин чадлыг 6 сая тонноор нэмэгдүүлэн, 38 сая тонн болгох шинэ 4-р шугамын ажлыг 2020 оны 4-р сард эхлүүлж, 2022 оны 8-р сард гүйцэтгэж дуусгасан. Тус Өргөтгөлийн ашиглалтыг оруулснаас хойш нэг жилийн хугацаанд 6 сая тонн хүдэр боловсруулж, төслийн хүчин чадлыг бүрэн ашигласан бөгөөд хоёр жилийн хугацаанд 11,4 сая тонн хүдэр боловсруулж, 338 сая ам.долларын бүтээгдэхүүн үйлдвэрлэсэн нь борлуулсан орлогоороо хөрөнгө оруулалтаа бүрэн нөхөж чадсан үр ашигтай төсөл болсон. Бид төслийн ажлыг хоёр жилийн хугацаанд тоног төхөөрөмжийг ажиллуулж, найдвартай ажиллагааг нь баталгаажуулж, технологийг нутагшуулж, төслийн хүчин чадалд нь хүргэж, хөрөнгө оруулалтаа нөхөж чадсан ийм цаг үед өнөөдөр төслийн ажлаа хүлээн авах ёслолын ажиллагааг хийж байна.