“Эрдэнэт 100 сая мод” хөтөлбөрийн дагуу хэвлэл мэдээллийнхэнд зориулсан уулзалтад “Эрдэнэт үйлдвэр”-ийн ерөнхий захирал Г.Ёндонгийн хийсэн танилцуулгаас товчлон хүргэж байна.

-Дэлхийн уул уурхайн хөгжлийн дэргэд Монголын уул уурхай харьцангуй залуу. Бид 102 жилтэйгээ золгож байна. Гэхдээ уул уурхайн байгаль орчинд үзүүлэх сөрөг нөлөө их тул бид мод тарьж эхэлсэн. Монгол хүний сэтгэхүйд газар сэндийчдэг хүнийг сайнаар ярьдаггүй. Тиймээс ч уурхайчдаа мод тарьж ургуулахыг хүсдэг. Уурхайчид маань тэтгэвэрт гараад дор бүртээ мод тарьж байгаа нь сайхан байна.

-“Эрдэнэт үйлдвэр” Ерөнхийлөгчийн санаачилсан “Тэрбум мод” хөтөлбөрийг дэмжиж, шинжлэх ухаанч байдлаар үүсгэн байгуулсан “Ойн генетикийн нөөцийн төв”-ийг иргэдэд нээлттэй ажиллуулж эхэллээ. Энэ дашрамд “Эрдэнэт үйлдвэр” 60-70 жил ажиллах нөөцтэй гэдгийг мэргэжлийн байгууллага тогтоосныг хэлэхэд таатай байна.

-2013 оны судалгаагаар “Эрдэнэт үйлдвэр” 1 сая тонн нүүрстөрөгч ялгаруулж байна. Энэ тоог бууруулахын төлөө жилд манай үйлдвэр 12 сая мод тарих ТЭЗҮ хийсэн. Үүнд хүрэхийн тулд “Үрийн генетик нөөцийн төв”, хөрсний технологийн төв, мод үржүүлгийн цогцолбор зэрэг шинжлэх ухаанч байгууламжийг байгуулаад байна.

-Хангалын гол дагуу 3 сая мод тарихаар төлөвлөж, өнгөрсөн онд 0,5 сая модыг үрээр болон мөчрөөр тарьсан нь ургалт сайн байна.

-Уул уурхайн үйлдвэрүүдийн хүлэмжийн хийн ялгаруулалтыг сансараас хянаж байна. Байгаль орчны нөхөн сэргээлт, нүүрстөрөгчийг саармагжуулахад хамгийн оновчтой арга бол мод тарих гэж үздэг. Мод бол бидэнд хэд хэдэн туулай буудах боломжийг өгч байна.

“Олон нийтэд мод тарихад нь зориулж зөвлөгөө өгөх, найдвартай, чанартай үр нийлүүлэх зэрэгт “Ойн генетик нөөцийн Эрдэнэт төв” хэзээд нээлттэй.