Шар усны үерт урсаж ирсэн жорлонгийн бохир дунд онцгой байдлын алба хаагчид л ажилладаг юм гэж аймгийн Засаг даргын орлогч М.Түмэнжаргал шуурхай зөвлөгөөн дээр сануулав.

Цас, зуд яах вэ. Бараг л болоод даваад дуусчихлаа. Хорогдсон малын тоо тэмдэглэгдэн баримт болоод үлдэнэ. Харин цаашид болох гамшиг, шар усны үерийг давж туулах бэлтгэл байна уу. Бас л болоод өнгөрсөн хойно нь хохирлын тоог тоолоод тайлагнах уу.

Өнгөрсөн долоо хоногт иргэдийн дуудлага гомдлыг 94 хувь барагдуулж, 6 хувь буюу Говил багийн Булагт хэсэгт халиа дош үүссэн дуудлагыг шийдвэрлэж чадаагүй байна. Онцгойн алба хаагчид шороо цацсан ч үр дүнд хүрээгүй, суваг шуудуу ухах хүсэлт, дуудлага ирсээр байгаа. Энэ мэт ажлуудад тухай бүрт нь арга хэмжээ авахгүй бол цаг агаар дулаарч өдөртөө нэмэх градуст хүрнэ. Өвөлжин орсон цас өнөөдрөөс эхлээд хайлж, халиа үүсгэн шөндөө хөлдөж дов толгод үүсгэх нь холгүй болчихсон. Энэ хэвэндээ үргэлжилвэл сарын сүүл буюу 16, 25, 29, 30-ны өдрүүдийн нэмэх градуст шар усны үер урсаад ирвэл хохиролгүй давж чадах уу.

Одоогийн байдлаар аймгийн хэмжээнд 215 өрх шар усны үерт өртөх аюултай, анхааруулга сэрэмжлүүлэг өгч ердөө хоёр өрхийн дөрвөн гэрийг шар усны замаас нүүлгэсэн байна. Тиймээс шар усны үерээс урьдчилан сэргийлэх ажлыг эрчимжүүлэн холбогдох байгууллагуудыг санаачлагаараа хэлүүлэлтгүй ажиллахыг шуурхай зөвлөгөөний үеэр ямартай ч даалгалаа.