Европын орнуудад “Kinder”  шоколаднаас бага насны хүүхдүүдийн дунд гэдэсний халдварт өвчний тохиолдлууд бүртгэгдсэн тул Мэргэжлийн хяналтын ерөнхий газрын удирдамжийн дагуу мэргэжлийн байгууллага тандалт, судалгаа хийсэн байна. “Kinder” шоколаднаас баруун Европ, Франц, Белги, Герман зэрэг улсад гэдэсний бүлгийн цусан суулга өвчлөл гарч 0-10 насны хүүхдүүдийн дунд 135 тохиолдол бүртгэгджээ. Эдгээрээс 105 тохиолдол нь батлагдаад байгаа аж.

Монгол улсад “Kinder” шоколадыг импортоор оруулж ирдэг долоон аж ахуйн нэгж бүртгэлтэй. Эдгээрээс “Таван богд” компани Орхон аймагт борлуулалтын үйл ажиллагаа эрхэлж байна. Иймд аймгийн Мэргэжлийн хяналтын газраас хүнсний худалдааны төв, дэлгүүрүүдэд тандалт судалгаа, бүртгэл хийж эхлээд байна.

“Kinder” шоколадны бүртгэлийг  Уртбулаг, Цагаанчулуут, Дэнж, Эрдэнэ багт үйл ажиллагаа эрхлэгч хүнсний дэлгүүрүүдэд хийжээ. Тандалт судалгаа, бүртгэл хийхэд одоогийн байдлаар уг шоколадны хадгалалтын хугацаа, журам, шаардлагад зөрчил дутагдал гараагүй байна.  Ялангуяа Белги улсад бүртгэгдсэн “Kinder” шоколад Орхон аймгийн хэмжээнд бүртгэгдээгүй байна. Манай аймагт борлуулж байгаа уг бүтээгдэхүүн ОХУ-д үйлдвэрлэсэн нь дийлэнх хувийг эзэлж байгаа аж.  “Kinder”  шоколаднаас үүсэлтэй Европын орнуудад бүртгэгдсэн цусан суулга халдварт өвчнөөс сэргийлж эцэг эхчүүд хүүхдүүддээ хараа хяналт тавьж, “Kinder” чихэр, шоколаднаас татгалзаж, сэргийлэх нь зүйтэй гэж хяналтын байгууллага үзлээ.