“Эрдэнэт” үйлдвэрээс  иргэд, аж ахуйн нэгжүүдийн цахилгаан, дулаан, хогны төлбөрийг 2020 оны арванхоёрдугаар сарын 31 хүртэл тэглэх шийдвэрийг У.Хүрэлсүхийн Засгийн газар гаргаж байлаа. Түүний дараахан нь 2021 оны эхээр энэ шийдвэрийг мөн оны долоодугаар сарын 1-н хүртэл үргэлжүүлэх болсон тухай Засгийн газар мэдэгдсэн. Ингээд  иргэн, аж ахуйн нэгжүүдийн цахилгаан, дулаан, хогны төлбөрийг дахиад л  тэглэсэн. Энэхүү шийдвэрийг Л.Оюун-Эрдэнийн Засгийн газар 2021 оныг дуустал үргэлжлүүлэхээр болсон.  

 Иргэн, аж ахуйн нэгжүүдийн хувьд цар тахлын үед төр, засгаас гаргаж буй шийдвэр хэмээн талархан хүлээн авч байгаа ч үүний цаана уурхайчдын хөлс, хүч хөдөлмөр байгааг тэр бүр мэддэггүй, бүр зарим нэг нь мэдэхийг ч хүсдэггүй.  Тиймдээ л асч  болох бүх гэрэл, цахилгаанаа хүртэл залгадаг, гэрлээ асаалттай нь орхидог, бүр унтдаг тухайгаа ид бах болгон тэнэгтэх нь энүүхэнд.

Эрдэнэт үйлдвэр болоод Сангийн яамнаас өгч байгаа мэдээллээс 2021 оны  оны хоёрдугаар хагас хагас жилд нийтдээ 1 сая 116 мянган хэрэглэгчийн хэрэглэсэн цахилгаан дулаан, уурын төлбөрт 493.8 тэрбум төгрөгийг “Эрдэнэт үйлдвэр” ТӨҮГ-аас дахин санхүүжүүлэх тухай тооцоо, судалгаа гарчээ. Жилийн дүнгээрээ тооцвол  зарим аж ахуйн нэгж, иргэдийн өмнөөс цахилгаан, дулаан, уурын төлбөрт жилдээ  959.9 тэрбум төгрөгийг төлнө гэсэн үг, мөхөс миний тооцоолсноор. Ингэхэд өөрийн ам бүлтэй айл хэдий хэмжээний төгрөгийн хөнгөлөлт эдэлж байгааг авч үзье.

Дөрвөн ам бүлтэй, сардаа 220 кВт.ц цахилгааны хэрэглээтэй, 50 м2 талбайтай орон сууцанд амьдардаг айл сар бүр цахилгаан эрчим хүч хэрэглэсний  төлбөрт  36.2 ямнган  төгрөг, дулааны төлбөрт 41.6 мянга, нийлээд  77.8 мянган  төгрөгийн төлбөрөөс бүрэн чөлөөлөгдөж байна. Ингэхэд энэхүү 77.8 мянган төгрөгийн Засгийн газар энэ айлын мөнгийг төлдөггүй л байхгүй юу. Засгийн газар бол шийдвэр, тогтоол гаргадаг байгууллага. Харин тэрхүү нэг айлын сарын цахилгаан, дулааны төлбөр болох 77.8 мянган төгрөгийг “Эрдэнэт үйлдвэр” ТӨҮГ-ийн зургаан мянган уурхайчин “үйлдвэрлэдэг”. Нэг үгээр хэлбэл дээрх 77.8 мянган төгрөг бол уурхайчдын хөлс, хүч хөдөлмөр. Тэдний бүтээсэн баялагийг тооцоод л Засгийн газар шийдвэр гаргадаг. Үүнийг мэдэхгүй зарим нэг нь цайны сүүний хоёр үнээнийхээ амбаарыг ч гэрэлтүүлэхээ мартаагүй. Харин үнээгээ дулаацуулах гэж үхрийнхээ саравчинд л халаагуур залгасангүй. Цар тахлын үед, ачааны хүндийг нуруун дээрээ үүрч ирсэн уурхайчдын гавьяаг Монголын төр үнэлэх байлгүй дээ. Дайны цагт эр цэрэг ачааны хүндийг нуруун дээрээ үүрдэг бол цар тахлын үед иргэн, аж ахуйн нэгжийнхээ эдийн засгийн хүнд ачаанаас уурхайчид, тэр дундаа Эрдэнэтийн уурхайчид үүрэлцэж байна.