Ийм шийдвэрийг Хэлний бодлогын үндэсний зөвлөлөөс гаргасан байна. Засгийн газраас  “Монгол бичгийн үндэсний хөтөлбөр III”-ыг батлан гаргасан. Хөтөлбөр  2020-2024 онд хэрэгжинэ. Үүнтэй холбоотойгоор Хэлний бодлогын үндэсний зөвлөл, Үндэсний статистикийн хороо хамтран Монгол улсад идэвхтэй ажиллаж буй 160 гаруй мянган төрийн албан хаагчийн үндэсний бичгийн мэдлэгийн түвшинг тогтоох ажлыг ирэх сард зохион байгуулах гэнэ.

“Монгол хэлний тухай хууль”-ийн дагуу 2025 оноос төрийн албан хэргийг кирилл болон монгол бичгээр хөтлөн явуулах юм. Энэ ажлын хүрээнд Монгол бичгийн хэрэглээний орчныг бүрдүүлэх зорилгоор “Төрийн мэдээлэл” сэтгүүлийг 2021 оноос эхлэн хос бичгээр хэвлэж, 2023 оноос зөвхөн монгол бичгээр хэвлэх бэлтгэл хангаж, хэрэгжүүлэх гэнэ. Мөн төрийн албан хаагчидтай холбоотой дараах ажлуудыг хийхээр тусгажээ. Үүнд: 

1. Төрийн албан хаагчийн анкет (маягт-1)-д монгол бичгээр унших бичих чадварыг тэмдэглэх хэсгийг нэмэх;
2. Төрийн албанд анх орох иргэдийн монгол хэл, бичгийн шалгалтын 20-иос доошгүй хувь нь монгол бичгийн агуулгаас бүрдсэн байх;
3. Төрийн албан хаагчийн албан тушаалын тодорхойлолтод тавигдах шаардлагад монгол бичгийн мэдлэг чадварыг нэмж тусгах;
4. Төрийн байгууллагууд өөрийн стратеги болон гүйцэтгэлийн төлөвлөгөө, албан хаагчдын сургалтын хөтөлбөрт ажилтны монгол бичгийн мэдлэг чадварыг дээшлүүлэх сургалтыг жил бүр төлөвлөх, тусгайлсан хөтөлбөр хэрэгжүүлж тайлагнах;
5. Төрийн болон хувийн хэвшлийн байгууллага бүр монгол хэл, бичгийн хянан найруулах чиг үүргийг холбогдох ажилтны ажлын байрны тодорхойлолтод тусгах;
6. Төрийн байгууллагууд албан бичиг хэргээ 2022 оноос эхлэн кирилл, монгол бичгээр зэрэгцүүлэн хөтлөх орчин бүрдүүлэх, туршиж эхлэх;
7. Хөтөлбөрийн холбогдох арга хэмжээг бүх шатны Засаг даргын үйл ажиллагааны хөтөлбөрт тусгуулан хэрэгжүүлж, монгол бичгийн хэрэглээг нэмэгдүүлэхэд санаачилга, үр дүнтэй ажилласан төрийн болон орон нутгийн өөрөө удирдах байгууллага, ажилтан, иргэдийг урамшуулах юм байна.