Дэлхийн бурханы шашинтнуудын хувьд дээгүүрт орох, Ази тивдээ л хоёр дахь том бурхан багшийн сэрэг дүрийг бүтээчих гээд чадахгүй, аргаа барж байгаа улс бол эрдэнэтчүүд бид. Ямар сайндаа л хөрш зэргэлдээх Дархан-Уул аймгийн төвд байх бурхан багшийн бүтээн байгуулалтыг хараад Эрдэнэтийн иргэд бусдаас нүүр бууруулж ичдэг тухайгаа өөр зууртаа шивэр авир хийдэг нь нууц биш. 2008 оны УИХ-ын сонгуулийн өмнө манай аймгийн Засаг дарга байсан Гаадангийн Шархүүгийн санаачилсан Бурхан багшийн сэрэг дүр хэмээх бүтээн байгуулалт нар салхинд элэгдсээр, энэ хугацаандаа ашиглалтад бүрэн орохгүй мөнгө хөрөнгийг хэдэн арван саяар нь ховх сорсоор байгааг жирийн иргэд үнэндээ ойлгохгүй байна. Дэлхийн хэмжээний бүтээн байгуулалт хийж байгаа ч түүнийхээ  зураг төсвийг нь ч хийлгээгүй учраас өнөөдрийн хувьд ийм байдалд хүргэчихээд байгаа хэмээн албаны хүн ярьж байна. Аймаг, орон нутгаас сүүлийн жилүүдэд тодорхой арга хэмжээ авч бурханы шашны байгууллагатай хамтран  ажиллаж байна. Ламбугай нар тэнд ном уншдаг, сан тавьдаг болсноор иргэд төдийгүй дотоодын аялал жуулчлал ч хөгжих эхний алхам хийгдэж байгаа гэнэ. Гэсэн хэдий ч энэ бүтээн байгуулалт нэг мэдсэн 10 жилийн нүүр үзжээ. Анх санаачилж эхэлсэн тэр цагаас хойш Бурхан багшийн сэрэг дүр зургаа дахь Засаг даргынхаа нүүрийг үзсэн ч бурханы сүсэгтнүүдийн, эрдэнэтчүүдийн хөлд дарагдсан олны хөлийн газар болж чадахгүй байгаа. Жил бүр л аймаг, орон нутгийн төсвөөс, татвар төлөгчдийн халааснаас их бага хэмжээгээр мөнгө, төгрөг гаргадаг. Энэ жил бас л 30 гаруй сая төгрөгөөр засварын ажил хийж байна. Өнгөрсөн онд бурханы их биеийг алтадсан, энэ жил бадамыг нь алтаар бүрээд байгаа. Бүр хэдэн жилийн өмнө  Сэрэг дүрийн ашиглалтын өмнөх захиргааг 5-6 хүнтэй байгуулаад ямаан дээр тэмээний газр болж тэдний урсгал зардлыг “Эрдэнэт” сангаас нөхөж байсан. Ямар ч байсан биднийг Бурхан багшийнхаа сэрэг дүрийг бүтээн байгуулж чадахгүй мунгинаж байх хойгуур НҮБ-аас буцалтгүй санхүүжилт болгон био ариун цэврийн байгууламжийн хөрөнгийг шийдэж өгснөөр тэнд очсон хүмүүс арай л уул руу харж морь харахаа больсон байна. Харин аймаг, орон нутгийнхан лам нарын номоо хурах орчинг нь бүрдүүлэх зорилгоор халаалтын асуудлыг нь шийдсэн байна. Их шүтээн цогцолборын захирал Б.Мөнхтогоо ламын санаачлагаар, аймгийн ИТХ-аас асуудлыг нь шийдсэний үндсэн дээр ямар ч байсан Бурхан багшийн сэрэг дүр тийш зорьдог автомашины замыг үндсэндээ шийджээ. Цогцолбор тийш зүглэхэд эртний түүх соёлын дурсгал болох хиргисүүр байдаг. Нийтийн тооллын өмнөх буюу бидний нэрлэдгээр МЭӨ хоёрдугаар зууны үед холбогдох энэхүү дурсгалыг тойруулан хашаа хатгажээ. Энэ мэтээр орон нутгаас эрвийх дэрвийхээрээ зүтгэж татавар төлөгчдийн мөнгийг Бурхан багшийн сэрэг дүрийн тохижилт нэрээр зарцуулж байгаа ч энэ бүтээн байгуулалт хэзээ олон нийтийнх болох нь хэдийд амь орох нь тодорхойгүй байна. Энэ талаарх аймгийн Засаг даргын орлогч С.Батжаргалын байр суурийг хүргэж байна.