“Халдварт бус өвчинтэй тэмцэх дэд хөтөлбөр”-ийг  аймгийн ИТХ-ын Тэргүүлэгчдийн хурлаар хэлэлцэн баталлаа. Энэ жилээс эхлэн 2021 он хүртэл хэрэгжих уг хөтөлбөрийг эрүүл мэндийн байгууллагын төлөөллүүд Тэргүүлэгчдэд танилцуулсан юм.  Аймгийн хэмжээнд зүрхний шигдээс, тархины цус харвалт зэрэг халдварт бус өвчин өндөр үзүүлэлттэй гарчээ. Тиймээс энэ өвчлөлд онцгой анхаарах хэрэгтэйг мэргэжилтнүүд хэлж байна. Нас баралтын дийлэнх хувийг халдварт бус өвчин эзэлж байгаа бөгөөд өвчлөгсдийн 69 хувь нь хожуу үедээ буюу 3,4 дүгээр шатандаа оношлогджээ. Шүд өвчилснөөр 200 орчим өвчний суурь болдог. Энэ өвчлөлийг зайлшгүй анхаарах халдварт бус өвчний нэгээр тооцож байна. Улсын хэмжээнд 5-9 настай хүүхдийн 90 гаруй хувь нь шүдний өвчлөлтэй байна. “Ерөнхий боловсролын гурван сургуульд шүдний кабинет байгуулсан. Сургуулийн сурагчдыг  хувийн хэвшлийн шүдний эмнэлэгт хөнгөлөлттэй үйлчлүүлэх талаар төлөвлөгөө боловсруулж байна” гэж аймгийн ЭМГ-ын дарга Т.Мөнхцэцэг мэдээлэв. Халдварт бус өвчнийг бууруулах , урьдчилан сэргийлэх, эрт илрүүлэлтийг сайжруулах зорилготой ажилд хувийн хэвшлийн эмнэлгийг хамруулах ёстой. Нийгмийн хариуцлагынхаа хүрээнд төсөл хөтөлбөрт ач холбогдол өгч оролцохыг Тэргүүлэгчид онцолж байлаа. Тэргүүлэгч Д.Эрдэнэбат “ Эцэг эхчүүд ихэвчлэн хүүхдийнхээ шүдийг эмчлүүлэхээр хувийн эмнэлэгт очдог.  Харин эмчилгээ хийсний дараа үр дүнгүй байгааг хэлэхэд, өөр газарт оч гэж тавласан хариулт өгдөг эмнэлэг ч байна. Нэрийг нь дурьдаад яахав. Хүний эрүүл мэндийн төлөө ингэж ажилладаг газар байхад, яаж халдварт бус өвчнийг багасгах вэ. Нийгмийн хариуцлагын асуудал гэж байдаг.  Медипас эмнэлэг бол Эрдэнэт үйлдвэрийн  ажилчдын хөлс хүчээр боссон. Энэ төсөлд 60 гаруй сая төгрөг дутсан гэсэн. Дутаад байгаа тэр мөнгийг Медипасаас  гаргуулах хэрэгтэй.  Бидний хөлс хүчээр бүтсэн газарт мөнгө олж байгаа. Би Эрдэнэт үйлдвэрийн ажилчин. Манай эмнэлэг болно гэж байгуулсан. Дараа нь өөр тийшээ явчихсан. Ийм гарц байж болно биз дээ. Эрдэнэт үйлдвэрийн Эмнэлэг сувиллыг энэ хөтөлбөрт оролцуулах шаардлагатай. Яагаад нийгмийн хариуцлагынхаа хүрээнд  аймгийн иргэдийн нэг асуудлыг чирээд явж болохгүй гэж... Хангалттай боловсон хүчин, санхүүгийн чадамж бий.  Энэ талаар та бүхэн санаачлагатай ажиллах хэрэгтэй” гэж хэлсэн юм. Тэргүүлэгчдийн зүгээс эрүүл мэндийн анхан шатны тусламж үзүүлэх өрхийн эмнэлгийн ажилчдын тоог нэмэх, төрийн бус байгууллагуудтай хамтран ажиллахыг санууллаа.  [sgmb id="1"]