[sgmb id="1"] Чихрийн шижин өвчинтэй тэмцэх дэлхийн өдрийг НҮБ-ын ивээл дор 2007 оноос эхлэн жил бүрийн арваннэгдүгээр сарын 14-нд тэмдэглэж байна. Дэлхийн 160 гаруй оронд нэг тэрбум гаруй хүнийг хамарч зохион байгуулдаг энэ өдөр нь олон нийтийн томоохон давалгаа болсныг мэргэжлийнхэн онцолж байна. Манай улс уг ажиллагаанд 2003 оноос нэгдэн, Чихрийн шижин өвчинтэй тэмцэх дэлхийн өдрийг жил бүр тэмдэглэж ирсэн. Манай аймгийн хувьд Чихрийн шижингийн өвчлөлтэй 705 хүн хяналтад байдгаас байнгын эм уудаг 118 хүн, инсулин тариа тогтмол хэрэглэдэг 170 хүн, эм, инсулин хамт хэрэглэдэг 37 хүн байна. Чихрийн шижин өвчин жил ирэх бүр олон хүнийг хамарч, дэлхий даяар аюулын харанга дэлдэж байгаа энэ үед Орхон аймгийн Эрүүл мэндийн газар, Бүсийн оношлогоо эмчилгээний төв тэмдэглэлт энэ өдөр олон нийтийг хамарсан үйл ажиллагаа зохион байгуулаагүй нь харамсалтай. Улсын хэмжээнд энэ жил “Эмэгтэйчүүд ба чихрийн шижин” уриан дор тэмдэглэн өнгөрүүлж байна. Өнөөдөр дэлхий дээр 199 сая эмэгтэй чихрийн шижин өвчтэй, энэ тоо 2040 онд 313 саяд хүрнэ гэж үзэж байна. Эмэгтэйчүүдийн нас баралтын тэргүүлэх шалтгаанд чихрийн шижин есдүгээр байранд байна. Хамгийн сүүлийн судалгаагаар Монгол Улсын хүн амын дунд чихрийн шижингийн тархалт 6,5 хувьтай байна. Мөн чихрийн шижингээр өвдөж магадгүй хүмүүс 9,5 хувьтай байдаг. Үүнээс үзвэл 100 хүн тутмын 5-6 хүн чихрийн шижин өвчтэй. Харин 100 хүн тутмын 10 нь чихрийн шижингээр өвдөх магадлалтай хүмүүс байгааг мэргэжлийнхэн онцолжээ. Б.Оюунзаяа