Орхон аймаг тэрбум мод үндэсний хөдөлгөөний хүрээнд 20 сая мод тарина. Үүний 20 хувийн тарьц суулгацыг аймгийн сум дундын ойн ангийн мод үржүүлгийн газраас хангах зорилготой ажээ. 
      Аймгийн ойн санг нэмэгдүүлэх зорилгоор үйл ажиллагаа явуулдаг Сум дундын ойн ангийн мод үржүүлгийн газар нь 3,5га талбай, 6*20 хэмжээтэй 11 хүлэмжид 11 төрлийн мод бут тарьж, ургуулж байна. 

      Жилдээ 50,000 ширхэг тарьц суулгац гаргадаг байсан бол өнгөрсөн жил бүтэц орон тоогоо нэмэгдүүлсэнээр тарьц суулгацын хэмжээ 150,000- 200,000 хүрч чадсан байна. Тэдний зорилго нь  2024 он гэхэд 300,000-500,000 ширхэг тарьц суулгац ургуулдаг болохоор ажиллаж буй юм. Ингэхийн тулд ил талбайн хөрс боловсруулалтыг нэмэгдүүлж, дахин 8 ширхэг хүлэмжийг ирэх онд орон нутгаас шийдвэрлэхээр төсвийн төсөлд санал оруулаад байна.  
      Мод үржүүлгийн газарт өнөөдрийн байдлаар шилмүүст модноос шинэс гацуур хуш, навчит модноос гүйлс буйлс, жимсний модноос монос, чацаргана, гоёлын модноос агч, навчит модноос бургас улиасыг мөчрөөр болон үрээр тарьж ургуулж байна.