Орхон аймагт хог хаягдлын менежментийг сайжруулах хөтөлбөр Аймгийн иргэдийн төлөөлөгчдийн хурлаар батлагдсан. Хөтөлбөрийн зорилго нь Монголын тандан судлаачдын холбоо, Байгууллагын ЛАБ Хот тохижуулах газартай хамтран  хог хаягдлыг ангилах, боловсруулах, тээвэрлэх зорилтын хүрээнд ААН, байгууллагыг чадавхижуулах сургалт зохиож байна. “Соёлоороо ялгарцгаая” уриатай бүтээлч хэлэлцүүлгийн 60 хувь иргэдийн оролцоотой 40 хувь мэдлэг олгох лекц, сургалт юм. Энэхүү сургалтыг үйл ажиллагаа явуулж байгаа 1733 ААН-д хэрэгжүүлэх гэнэ.

     Айл өрх, албан байгууллагаас гардаг хог хаягдлыг гурав ангилна. Үүнд цаас, хуванцарын төрлүүд шил, лааз, төмөр гэх зэрэг нь дахин ашиглагдах хог хаягдал юм. Хоёр дахь нь  аккумулятор, батерей нь аюултай хог хаягдал гэж үзнэ. Харин үнс, живх, чихрийн цаас зэрэг нь дахин ашиглагдахгүй шууд төвлөрсөн хогийн цэг рүү ачигдах хаягдал гэж үздэг. Иргэд болон ААН-үүд хог хаягдлаа Хот тохижуулах газраас заасан өдөр, цагт нь тогтоосон цэгт гаргаж тавьдаг байх. Эсвэл хогны машин ирэнгүүт гаргаж ачуулдаг зөв дадалд хэвшиж сурах юм.

 Хог хаягдал байгальд бүрэн задарч дуусталаа урт хугацааг зарцуулж, газрын хөрс, ус, агаарт олон төрлийн хорт бодис, хүнцлийн агууламж бүхий хорыг тасралтгүй цацдаг байна. Хогноос хордсон усыг хүн, мал, амьтан ууж, хордсон агаараар амьсгалж, хорт хавдар, амьсгалын замын  гэх зэрэг өвчин үүсдэг. Нийгмийн хөгжил, үйлдвэрлэл, үйлчилгээний цар хүрээ, хүн амын өсөлтийг даган Эрдэнэт хотын хог хаягдлын хэмжээ жил бүр өссөөр байна. Олон талт оролцоот хог хаягдлын хамтын менежментийн зөв тогтолцоог хөгжүүлсэнээр өндөр хөгжилтэй улс орнуудын адил хөгжин дэвших юм. Хог хаягдлын менежментийг хэрэгжүүлж, иргэн иргэндээ шаардлага тавьж,занших нь иргэн бүрийн оролцоотой нийгмийн хариуцлага болоод байна.