Хүний амьдралд юу эс тохиодог билээ дээ. Орхон аймгийн АН-ын дарга, Орхон аймгийн Засаг дарга Г.Зоригтын бие чилээрхжээ. Хөөрхий дөө, 2012 оны орон нутгийн сонгуулиар намаа гайхалтай удирдаж, АН-ын түүхэнд байгаагүй ялалт ачирсан. Дараа нь 2013 оны Ерөнхийлөгчийн сонгуульд бас Орхон аймгийн АН-ыг хийморьтой “жолоодож” Эрдэнэтийн унаган хүү Цахиагийн Элбэгдоржийг Монгол улсын Ерөнхийлөгчийн сонгуульд дахин сонгуулж чадсан, Эрдэнэтийн ардчилагчдын эв нэгдлийн алтан титэм болсон энэ хүнд “Баярлалаа” гэж хэлэх ч багадна. Г.Зоригтын энэ амжилтуудад атаархсан хар элээнүүд түүнийг Засаг дарга болсных нь маргаашаас л “Өвчтэй хүнээр яаж орон нутаг удирдуулах гээд байгаам бэ” хэмээн гуаглалдсан. Түүний бие тэнхээрхүү байсан нь үнэн. Гэхдээ Эрдэнэт хотод 23 жилийн дараа дөнгөж галаа бадамлуулж эхэлсэн ардчиллынхаа мянга, мянган гишүүдийн итгэлийг даах их тэнхээ, оюуны хүч чадал, хүн чанар түүнд амин дэм болж өнгөрсөн хоёр жилд Орхон аймгийг онцгой сайн удирдлаа. Ингэж хэлэхийн учир гэвэл, орон нутгийн эрх баригчид төсвийн мөнгийг зөв зүйлд зарцуулвал ийм үр дүнд хүргэж болдог юм гэдгийг олон түмний нүдэнд харагдаж, гарт баригдтал хийгээд харуулаад өглөө. Тухайлбал, Орхон аймгийн түнэр харанхуй орчинтой гэр хорооллыг өдөр шиг гэрэлтүүлж чадлаа. Аймгийн Засаг даргын ажлыг авсан өдрөөс эхлэн, цэцэрлэгт хамрагдаж чаддаггүй байсан мянга, мянган хүүхдийн эрх ашгийн төлөө санаа тавьж 4 сургуулийн байрыг чөлөөлөн 1000 гаруй хүүхдийг цэцэрлэгтэй болгосон. Үүнийг дагаад шинэ цэцэрлэгүүдэд 140-өөд хүн байнгын ажилтай ч болов. Бас гэр хорооллын 11, 22, 23-р цэцэрлэгийг төвлөрсөн шугамд холбож, бохир ус татан зайлуулах асуудлыг нь шийдвэрлэв. Орон сууцны байрууд болон гэр хороолол дунд хүүхдийн орчин үеийн тоглоом бүхий амралт, чөлөөт цагийн 13 талбайг шинээр байгуулж, тохижууллаа. А.Амарын талбай, аюулгүйн тойрог, хотын төв гудамж дагуу гэх мэт газруудад ногоон байгууламж, цэцэгжүүлэлтийг шинэлэг хэлбэрээр хийлгэж үлгэр үзүүлэв. Хот доторх болон орон сууцны байр хоорондох мөн гэр хорооллын замуудыг шил толь адил болгож амжлаа. Бараг 20 гаруй жил зогсонги байсан Эрдэнэт хотын бүтээн байгуулалтын шинэ гарааг эхлүүлснээр 7, 7а, “Эко” хороолол, 2а, 1а хорооллыг барьж байгуулах ажил хийгдээд эхэлснийг та бид харж байна. Өнгөрсөн 2 жилд нийт 856 айлын орон сууц ашиглалтанд оруулсан бөгөөд одоо 558 айлын 13 орон сууцны барилга Эрдэнэт хотод баригдаж байна. Тэрээр Орхон аймагт Аж үйлдвэрийн паркийн хилийн цэсийг баталгаажуулж, тэнд жижиг дунд үйлдвэрүүд барьж байгуулах гэсэн санал санаачилгыг бодлогоор дэмжин ажилласны үр дүнд өнгөрсөн хоёр жилд энэ орон нутагт 57 үйлдвэр шинээр байгуулагдсан байна. Тэдний дотор Бэрэн группийн Төмөрлөгийн цогцолбор үйлдвэр, “Ачит Ихт” ХХК-ийн цэвэр зэсийн үйлдвэр, цаашлаад асфальтны, хөөсөнцөр хавтангийн, маскны, резиний, Лед гэрлийн гэх мэт импорт орлох болон экспортын бүтээгдэхүүний үйлдвэрүүд өнгөрсөн хоёрхон жилийн дотор үүд хаалгаа нээлээ. Эдгээрт ажилд орсон олон мянган хүний амьдралын баталгаа хангагдсан гээд бодохоор аймгийн Засаг даргын бодлогоор хэрэгжүүлсэн үйл ажиллагааны үр дүнг үнэлж барамгүй. Ардчилсан үзэлтэй хүн бүхний сэтгэлийн зул болсон Монгол улсын анхны Ерөнхий сайд агсан А.Амарын хөшөөг Гендирекцийн гаднаас нүүлгээд байх ёстой газар нь буюу Орхон аймгийн Нутгийн удирдлагын ордны өмнө авчирч хүндэтгэлтэй байрлуулсан нь мөн л Г.Зоригтын шийдвэр байсан. Өнөөгийн бидний амар амгалан амьдралын төлөө халуун амиа өргөсөн эх орончийн төрсөн нутагт ажиллаж амьдарч буй Эрдэнэтийнхэн энэ хүний гавьяат үйлсийг үеийн үед дурсан санаж, хүндэтгэж биширч явахын учир утгыг ойлгуулах гэж энэ ажлыг хийсэн. Бүрэн эрхийнхээ 4 жилийн дөнгөж хоёрхон жилийг энэ мэт олон амжилтаар үдсэн аймгийн Засаг дарга, Орхон аймгийн АН-ын дарга Г.Зоригт энэ сарын 25-нд хуралдсан аймгийн АН-ын хорооны хурал дээр “Эрүүл мэндийн шалтгааны улмаас аймгийн АН-ын даргын үүрэгт ажлаас чөлөөлж өгнө үү” гэсэн хүсэлт гаргалаа. Журмын нөхөд нь ч түүнийг ойлгож, хүсэлтийг нь хүлээн авч, АН-ын даргын үүрэгт ажлаас нь чөлөөлөв. Намын даргын ажлаас чөлөөлөгдсөн тэр агшинд Засаг дарга маань “2007 оноос хойш бүх шатны сонгуульд хамтдаа байж ялагдлын гашууныг, ялалтын сайхныг хамтдаа мэдэрсээр ирсэн журмын нөхөддөө талархал илэрхийлье” гээд цаашид эв эетэй байхыг дахин дахин хичээнгүйлэн захив. Журмын нөхөд нь ч түүнд талархал илэрхийллээ. Мөн Орхон аймгийн АН-ыг байртай болгоход түүний оруулсан их хувь нэмрийг өндрөөр үнэлэн зарим нөхөд нь хоолой зангируулан талархлын үгээ дэлгэж байсан. Зоригт дарга АН-ын даргын ажлаа л хүлээлгэн өгсөн болохоос Ардчилсан нам, МоАХ-оос хэзээ ч нүүр буруулахгүй. Учир нь тэр Монголын нийгэмд цоо шинэ өөрчлөлт шинэчлэл авчирсан гавьяатай Цагаан морин жилийн ардчилсан хувьсгалын анхны партизануудын нэг. Тиймээс ч түүнийг Орхон аймгийн АН-ын даргын ажлаа хүлээлгэн өгөх тэр агшинд “Чингисийн одон”-гоор шагнасан тухай баяртай мэдээг Улаанбаатараас дуулгаж, журмын нөхөд нь түүнд баяр хүргэн алга ташиж, эрүүл байхын ерөөлийг олонтаа өргөлөө. Энэ сайхан ерөөл бат орших болтугай. Ж.ОЮУН