Монголын улс төр ганхаж, улстөрчид нь увайгүй, түмэн олны мөнгийг өөрийн мэт дураар тонгочуулж, хуулийг гажуудуулж эхэлсэн тогтолцоонд хамгийн ихээр нэрвэгддэг салбар бол хэвлэл мэдээллийнхэн гэдгийг бид харж байна. Олон нийтэд эрх баригчдын үйлдлийг шууд, ил тод харуулах, мэдээлэхэд хүчин мөхөсдөж, төр хэмээх асар их мөнгөтэй баян мангаст залгиулах гэж амь наана, там цаана яваа өчүүхэн жижигхэн амьтан болон хувираад буй. Гэхдээ бид агуу том зааныг дотроос нь сэмлэж, бага багаар мэрж унагаах аргаа олсон байдаг, өнөө “жижигхэн амьтад”. Тэр хүчийг бид эвлэн, нэгдэж байж хүчээ хуримтлуулан дайрах арга гэж үзээд, анхны ялалтаа байгуулсан нь Эрдэнэтийн хэвлэл мэдээллийн гурван редакци өнөөдөр Монголын сэтгүүлчдийн Нэгдсэн эвлэлийн “Оны Онцлох бүтээл”-ийн эзэд болцгоож, “Ган үзэг” шагнал гардан авцгаалаа. Өргөн нэвтрүүлгийн эфирийн Тусгал-1 Телевизийн шууд дамжуулалтын техникийн бааз суурь, 16 жилийн туршлага, цахим мэдээллийн орон зайд өөрийн уншигчид, хандагчдын тоогоор илү

үрхсэн ЭрдэнэтИнфо сайт, сүүлийн жилүүдэд хурдтай, мэдрэмжтэй ажиллаж байгаа Update.mn сайтын хамтарсан хэлэлцүүлгүүд “Ган үзэг” наадмын хамгийн содон шагнал болсон. Учир нь редакциуд нэгдвэл үүнээс илүүг хийж, төрийн данхар хэвлэлийн албатай өрсөлдөж чадна гэдгийг харуулсан. Тэд орон нутагт анх удаа нийгэмд бухимдал үүсгэсэн “Эрсдэлтэй бүс дэх боловсрол”, “50 тэрбумын зам хаана явна” сэдвээр нээлттэй хэлэлцүүлэг хийсэн нь том ажлынх нь супер эхлэл гэж үзэж байна. Сэтгүүлч М.Мөнхцэцэг, Э.Одсүрэн, Б.Соёл-Эрдэнэ, Б.Рэнцэнханд, Э.Норсон, шууд дамжуулалтын Найруулагч Ж.Улаанхүү, зураглаач М.Шинэбаяр, Г.Нармандах зэрэг гар сэтгэл нийлсэн багийнханы 2025 оны ажлын үр дүн ийнхүү амжилтад хүрлээ. Монголын Улсын Их хурал нээлттэй сонсгол зохион байгуулж, ЖДҮ, Оюутолгой зэрэг хаалттай сэдвийг олон нийтэд ил болгож байгаа нь Ардчилсан Монгол Улсын амин сүнс үзэл сэргэж буй гэрэлт үеийн эхлэл гэж харахаар. Харин орон нутагт хэвлэл мэдээллийн бие даасан, хараат бус Редакциуд нэгдэж, иргэдэд нээлттэй хэлэлцүүлгүүдийг орон нутгийн халуун сэдвээр явуулж байгаа нь хонгилын үзүүрт гэрэл харагдахын түүчээ болж байна.