Эрдэнэс таван толгой компанийн ноогдол ашгаа авч чадаагүй иргэдийн хувьд эхлээд Э-Монголиа систем рүү нэвтэрч орох хэрэгтэй. Дийлэнх иргэдийн хувьд ашгаа авч чадахгүй байна гэдэг саналыг тавьдаг боловч ноогдол ашиг нь өөр данс руу шилжин орсон байдаг. Ялангуяа 2024 оны дөрөвдүгээр сард олгогдсон ноогдол ашгаас өөр данс руу орсон тохиолдол их байгаа. Иймд Э-Монголиа систем рүү нэвтэрч ороод “Үнэт цаас хувьцаа” гэсэн хэсэг дээр ноогдол ашиг нь хэдэн онд ямар данснаас ямар данс руу гүйлгээ хийсэн мэдээлэл бүрэн орсон байгаа. Мөн амжилтгүй гүйлгээнүүд нь харагдана. Хэрэв амжилтгүй гүйлгээ хийгдэж ноогдол ашиг нь өөрийн бүртгэлтэй аль ч дансанд нь ороогүй тохиолдолд тухайн бүртгүүлсэн үнэт цаасны компанидаа дансны дугаараа солиулах хүсэлт гаргадаг. Мөн мэдээллээ бусад үнэт цаасны компани руу шилжүүлэх боломжтой. Эрдэнэс таван толгой 1072 хувьцааны ноогдол ашгийг өмнө нь 2012 оны 4-р сарын 11-нээс өмнө төрсөн иргэдэд олгож байсан бол 2024 оны нэгдүгээр сарын 11-ний өдөр батлагдсан Засгийн газрын тогтоолоор 2023 оны 12 сарын 31-нээс өмнө төрсөн Монгол Улсын бүх иргэнд олгох шийдвэрийг гаргасан. Монгол Улсын бүх иргэнд олгоно гэж байгаа боловч их, дээд сургуулийн сургалтын төлбөр төлсөн хүмүүс, ахмад настнууд улсад буцаагаад зарсан зэрэг иргэдийн хувьд ноогдол ашиг нь орохгүй. Дараагийн ноогдол ашиг хэзээ орох нь тодорхойгүй ЭТТ-н ТУЗ-н шийдвэрээр тодорхой болно. Орхон аймагт “Би Ди Сек”, “Гүүд Сек” зэрэг үнэт цаасны компаниуд ажиллаж байна.