Эрдэнэт үйлдвэрийн удирдах ажилтнуудын ээлжит шуурхай зөвлөгөөний эхэнд үйлдвэрийн удирдлага, зохион байгуулалт бүтцийн өөрчлөлтөд хийгдэж буй шинэ томилгооны талаар Ерөнхий инженер Т.Батмөнх танилцуулав. Тус үйлдвэрийн Хяналтын асуудал хариуцсан менежерээр Ишжамцын Мөнхжаргалыг томилж, энэ сарын 13-наас үүрэгт ажилдаа орж буйг мэдээллээ. Хяналтын асуудал хариуцсан менежер И.Мөнхжаргал нь 1997-2000 онд ШУТИС-д технологич инженер, үйлдвэрлэлийн менежмент, 2005 онд “Шинэ иргэншил” дээд сургуульд бизнесийн удирдлага, 2013-2016 онд “Түшээ” дээд сургуульд эрх зүйч мэргэжлээр тус тус суралцаж, төгссөн. Технологич инженер, эрх зүйч мэргэжилтэй, техникийн ухаан, бизнесийн удирдлагын магистр зэрэгтэй. 2002-2009 онд ШУТИС-ийн Менежментийн тэнхимд багш, 2004-2014 онд “Төгөлдөр” ХХК-д захирал, 2014-2017 онд “Бат Энх Хүү” ХХК-д захирал, 2017-2021 онд АТГ-ын Олон нийтийн зөвлөлийн гишүүн, 2022-2023 онд Ардчилсан намын ХЭГ-ын Ерөнхий нарийн бичгийн дарга, 2024-2025 онд Монгол Улсын Засгийн газрын Хяналт, үнэлгээний үндэсний хорооны сайдын зөвлөх зэрэг албанд тус тус ажилласан байна. Хяналтын асуудал хариуцсан менежерээр томилогдоод буй И.Мөнхжаргал, дээрх танилцуулгын дараа “Монгол Улсын Засгийн газрын үүрэг чиглэлийн дагуу төрийн өмчит үйлдвэрийн газруудын үр бүтээмжийг дээшлүүлэх, ил тод нээлттэй болгох, авлига албан тушаалын гэмт хэргээс ангид байлгах даалгавар өгч, миний биеийг энд томилон ажиллуулахаар шийдвэрлэсэн болно. Та бүхэнтэй Эрдэнэт үйлдвэрийнхээ ирээдүйн сайн сайнхны төлөө хамтран ажиллах болсондоо таатай байна” гэсэн юм. 

Оны эхний 10 хоногийн үйлдвэрлэлийн төлөвлөгөөний биелэлтийг Үйлдвэрлэл, техникийн хэлтсээс мэдээллээ. 2025 оны эхний арав хоногт уурхайчид төлөвлөснөөс 153 мянган метр куб уулын цул гаргаж, төлөвлөгөөг 117 хувиар биелүүлсэн бол 41.2 мянган метр куб хөрс хуулалтын ажил илүү гүйцэтгэж, төлөвлөгөөт үзүүлэлтээ 110 хувиар биелүүлээд байна. Мөн 1577 мянган тонн хүдэр олборлож, төлөвлөгөөг 122 хувиар, 1156 мянган тонн хүдэр боловсруулан, төлөвлөгөөг 116 хувиар тус тус биелүүлжээ. Энэ хугацаанд хүдэр дэх зэс, молибдены агуулга 96-101 хувь, металл авалт 99.8-103 хувьтай байгаа бол баяжмал дахь зэс, молибдены агуулгын төлөвлөгөө 101-103 хувиар биелсэн байна. Эхний арав хоногт 15771 тонн зэсийн баяжмал, 102 тон молибдены баяжмал ачуулж, зэс, молибдены баяжмалын чанарын төлөвлөгөөг 102.4-103.6 хувиар тус тус биелүүлэн ажиллаж буйг мэдээлэлдээ онцлов.
Мэдээллийн технологийн хэлтсээс оны эхнээс ERP системийн худалдан авалтын модуль нэвтрүүлэлтийн ажлыг эхэлсэн байна. Уг модуль нэвтрүүлэлтэд нийт 500 орчим ажилтан ажиллах бөгөөд эдгээр ажилтныг сургалтад хамруулахад бүтцийн нэгжийн удирдлагууд дэмжиж оролцохыг тус хэлтсээс хүслээ. Мөн энэ сарын сүүлээр үйлдвэрийн хэмжээнд хүний нөөцийн модуль нэвтрүүлж эхлэх бөгөөд үүнд бүх ажилтнууд хамрагдах юм байна. Түүнчлэн, 2025 онд санхүү, агуулах, цаг бүртгэл, хөдөлмөрийн хувийн хамгаалах хэрэгсэл зэрэг чиглэлээр модуль нэвтрүүлэлт хийгдэж эхлэхээр төлөвлөж буйг Мэдээллийн технологийн хэлтсийн дарга Б.Гансүх танилцууллаа. Тус хэлтсээс үйлдвэрийн цаг бүртгэлийн төхөөрөмж суурилагдаагүй 32 байршилд “Time master” цаг бүртгэлийн систем байршуулсан байна. Энэ системээр нийт 4300 ажилтан ажлын цагаа бүртгүүлэх болсноор үйлдвэрийн бүхий л байршилд цаг бүртгэлийн төхөөрөмж бүрэн ашиглагдах боломжтой болжээ. Эдгээр төхөөрөмжийг ашиглах зааврыг ажилтнуудад хүргэх, таниулахад бүтцийн нэгжийн удирдлагууд идэвх санаачилгатай, хамтран ажиллах шаардлагатайг Мэдээллийн технологийн хэлтсээс анхаарууллаа. 
2025 он Эрдэнэт үйлдвэрийнхний хувьд өндөр ачаалалтай жил болно. Хүдэр олборлолтыг 46 сая тонн, боловсруулалтыг 40 сая тоннд хүргэх төлөвлөгөө хэрэгжүүлнэ. Энэ үзүүлэлтийг дагаад уулын бүхий л ажлууд нэмэгдэх тул нарийн төлөвлөлт, өндөр зохион байгуулалттай ажиллах шаардлага бий болж буйг Ерөнхий инженер шуурхайн төгсгөлд онцлов. Түүнчлэн, томоохон төсөл, бүтээн байгуулалтын ажлуудыг дуусгаж, ашиглалтад оруулна. Тухайлбал, Ил уурхайд мөчлөгт урсгал тээврийн технологи буюу конвейерын системийг эхний хагас жилд бүрэн нэвтрүүлж, дуусгах юм. Энэ оны “Их зогсолт”-ын бэлтгэл хангах ажлыг оны эхнээс эхэлнэ. Үүнтэй холбоотойгоор шаардлагатай сэлбэг хэрэгсэл, бараа материалын хангамж, нийлүүлэлтийг урьдчилан нарийвчлан төлөвлөж, цаг хугацаанд нь хүлээж авах бэлтгэл хангана. Тийм учраас бүх газар, хэлтэс, цех нэгжүүд ажлын уялдаа холбоогоо нягтруулж, зохион байгуулалтын өндөр түвшинд ажиллах, өмнөх амжилт ололтоо хадгалан хөдөлмөрийн аюулгүй байдал, худалдан авалтын үйл ажиллагаанд онцгой анхаарч ажиллахыг үүрэг болголоо. 

Эх сурвалж: erdenettoday.mn