Орхон аймгийн одоогийн Иргэдийн хурал бүрэн бүрэлдэхүүнээрээ тарж, нүүх үү, эсвэл намын бүлэг харгалзахгүй эвлэж чадсанаар үлдэх үү гэдэг хоёр сонголт байна. Эрх баригчаар олон жил хөрөнгө мөнгөө дангаар эзэгнэж сурсан МАН ганцхан төлөөлөгчийн илүү гэдгээ мартаж, хүч түрэх гээд байгаа нэг айхтар том гэм байна. Өмнөх найман жил шигээ Иргэдийн хуралд “ах нар” олонхи болоогүй гэдгээ л хүлээн зөвшөөрчихмөөр байгаа юм. Орхон аймгийн 2025 оны төсвийг батлах хариуцлагатай хуралд МАН-аас 19, АН-аас 20 төлөөлөгч ирсэн. Уг нь бол хурал хуралдаад явах олонхи бүрдсэн үү гэвэл бүрдсэн. Харин МАН-аас өвчтэй байгаа хоёр хүнээ цахимаар оролцуулж байж олонхи болно. Бид олонхийн саналаар төсөвөө батлана гэсэн байр суурьтай байна. Энэ удаагийн хуралд олонхи болсон АН хурлаа үргэлжлүүлж, төсөвөө батлая гэсэн саналтай. Ёстой нөгөө “хүсэхэд хясна” гэгч нөхцөл үүслээ. Ганцхан саналын зөрүүтэйгээс ийм адармаатай байдал үүнээс хойш байнга үүснэ гэдгийг хоёр намынхан мэдэж байгаа. Одоо яах вэ, хоёр нам хоёр тийш хараад гөжүүдлээд суух уу. Эдний яриад байгаа Хурлын дэг гэсэн эрх зүйн баримт бичгээ энэ хүмүүс өөрсдөө баталсан. Ямар үед төлөөлөгч цахимаар оролцох вэ гэхээр орон нутгийн нийгэм эдийн засгийн амьдралд онц ноцтой нөхцөл үүссэн үед яаралтай хуралдах ээлжит бус хуралдаанд төлөөлөгч цахимаар оролцоно гэж заасан. Харин өнөөдрийн төсөв батлах хуралдаан бол онц нөхцөл байдал үүссэн хурал биш ээ гэж АН-ынхан үзэж байна. Засаг захиргаа нутаг дэвсгэрийн нэгжийн тухай хуулийн 36 дугаар зүйлд зааснаар Орхон аймгийн ИТХ энэ сард багтаж, орон нутгийнхаа төсвийг баталж чадахгүй бол Засгийн газрын санаачлагаар аймгийн Иргэдийн хурлыг тараах хуультай гэж байгаа. Одоогийн энэ хурал дээр намын Бүлэг гэж томроод байх бол гарц биш. Харин нам харгалзахгүй нийлж ярилцаад эвлэж нэгдээд явбал өлзийтэй. Дээрээ Засгийн газар нь олон намаар бүрдсэн болохоор ганц аймгийн Иргэдийн хурлыг олонхи гэж хүч түрж онгирохыг МАН-ын дээд удирдлага нэг их тулгахгүй. Орхон аймгийн Иргэдийн хурал зөвшилцлөөр эв зүйд орж, аймгийн болоод хоёр сумынхаа төсвийг хуучин ондоо багтаан баталж, түмэн олныг хөлдөө чирж ядраахгүй байгаасай. Эсвэл цаашид дөрвөн жил ингэж өөх ч биш булчирхай ч биш байхаар нэг мөсөн энэ хурлаа тараачихаач.