Газар нутгийн хүртээмж муу Орхон аймаг, Эрдэнэт хотын газрын харилцааны асуудлаар 2024 онд ямар бодлого баримтлав, ирэх онд иргэд, аж ахуйн нэгжид ээлтэй шийдвэр гарах уу гэсэн асуудал аймгийн ИТХ-ын нэгдүгээр хуралдааны гол сэдэв байлаа. Хуралдаанд Орхон аймгийн Газрын харилцаа барилга хот байгуулалтын газрын дарга Д.Цолмонгийн хийсэн мэдээллийг хүргэж байна. Энэ жил Монгол Улсын Засгийн газраас “Цахим засаглал”-ыг хэрэгжүүлэхтэй холбоотой улсын хэмжээнд газрын харилцааны бүртгэлийн үйл ажиллагаа нь e.gazar.gov.mn цахим системээр зохион байгуулж хөтлөн явуулдаг болсон. Үүнтэй холбоотой манай аймаг анх удаа иргэдэд гэр бүлийн хэрэгцээний зориулалтаар шинээр газар эзэмшүүлэх ажиллагааг цахим системээр зохион байгуулсан. Ингэснээр хүний оролцоо, иргэдээс гардаг хардлага сэрдлийг бууруулах зорилготой шинэлэг ажил болсон байна. Цахим системээр иргэдэд гэр бүлийн хэрэгцээний зориулалтаар газар эзэишүүлэх ажилд Монгол улсын иргэд E Mongolia цахим системд өөрийн эрхээр бүртгэлээ хийж газрын асуудлаа шийддэг зохион байгуулалтад орсон. Цаашид хүний оролцоог багасгасан цахимаар иргэд тэгш хүртээмжтэй оролцох энэ ажил уламжлал болгон явагдана. Мөн хаягжуулалт, газар зүйн нэрийy зураг гаргах зэрэг томоохон ажлыг хийж хэрэгжүүллээ. Цахим системийн ашиглалттай холбоотой иргэн аж ахуй нэгжүүд төрийн байгууллагын ажлын цаг, ажилтны ажлын ачааллаас хамаарч хүлээгдэл үүсдэг байсан. Одоо газар эзэмшигч, ашиглагч, өмчлөгч этгээд 24 цагийн хугацаанд цагийн хязгаарт баригдахгүй өөрийн нэр дээр бүртгэлтэй газрын гэрчилгээ, кадастрын зураг, гэрээ түүнтэй холбоотой бусад бүртгэлийн хүсэлтийг 24 цагаар цахим системд хандаж илгээх боломжтой болсон. Энэ нь газрын харилццааны салбарын үйл ажиллагааг ил тод болгоход чиглэсэн чухал ажлуудын нэг юм. Энэ жил аймгийн ГХБХБГ-аас цахим системийн дотор агуулагдаж байгаа мэдээллийг алдаагүй үнэн зөв болгоход чиглэсэн ажлуудыг эхлүүлж байна. Үүнд: Баян-Өндөр сумын суурьшлын бүсийн 40 га газрын 1:1000 масштабтай байр зүй зургийн тусгалыг шинэчлэх ажлыг зохион байгуулсан. Тусгай зөвшөөрөлтэй компаниуд сонгон шалгаруулалтад ороод “BBKH” компани шалгараад энэ ажлыг хийж гүйцэтгээд тайлангаа өгөөд байна. Манай байгууллагын эрхэлдэг үйл ажиллагааны дотор сүүлийн үед нилээн ач холбогдолтой яригдаж байгаа ажил бол энэ хаягжуулалтын ажил байгаа. Аймгийн хэмжээнд хаягжуулалтын ажил хугацаа алдаж эхэлсэн нь нэг шалтгаантай. Яагаад гэвэл Орхон аймаг байх уу, Эрдэнэт хот байх уу гэдэг засаг захиргааны нэгжийн өөрчлөлттэй холбоотой энэ ажил хүлээгдэж байсан. Хот тосгоны эрх зүйн байдлын тухай хуулийн найруулагатай холбоотойгоор хаягжуулалтын ажлыг одоо байгаа эрх зүйн орчиндоо тааруулаад аймгийн хэмжээнд шинээр хийж эхлээд байна. Энэ жил гудамж талбайн нэрийн хаягжуулалтын зургийг цахим системд оруулах ажлыг зохион байгууллаа. Мэргэжлийн тусгай зөвшөөрөлтэй компани энэхүү ажлыг хийж гүйцэтгээд ажлын тайлангаа өнгөрсөн долоо хоногт ирүүлсэн. Бид хяналт хийгээд хүлээн авах ажлыг зохион байгуулна. Хаягийн нэрийн зурган дээр бид нэр болон нэрэмжит талбай болгох нэршил өгөөгүй газруудыг кодлон оруулж байгаа. Дараа нь аймгийн Хаягийн нэрийн зөвлөл тухайн газруудад албан ёсны оноолт нэр өгөх асуудал шийдэгдвэл шинэчилж өөрчлөх боломжтой байдлаар энэ ажлыг зохион байгуулж байна. Энэ жил цахим системээр газрын харилцааны бүртгэл болон иргэдийн хүсэлтийг шийдвэрлэх ажил зохион байгуулсантай холбоотой аймгийн хэмжээнд хууль эрх зүйн сургалт сурталчилгаа иргэдэд мэдээлэл өгөхөд анхаарч ажилласан. Үүнд, аймаг орон нутгийн байгууллагууд хурлын төлөөлөгчид дэмжиж оролцсонд талархлаа илэрхийлье. Хамгийн эхний ээлжинд багийн нэр нь солигдсон айл өрхүүдийн бүртгэлийг шинэчлэхэд ач холбогдол өгч ажилласан. Үүний үр дүнд тодорхойгүй байсан үл хөдлөх хөрөнгийн гэрчилгээ нэг хаягтай, газрын гэрчилгээ өөр хаягтай байсан зэрэг асуудлыг боломжит хэмжээнд цэгцэлсэн. Энэ ажил цаашид үргэлжилнэ. Газрын харилцааны талаар 2025 онд баримтлах үйл ажиллагааны хувьд аймгийн Засаг даргын иргэдтэй хийсэн уулзалтуудын үеэр гарсан нийтлэг саналууд, байгууллагын өдөр тутмын үйл ажиллагаанд ашиглаж байгаа иргэн, аж ахуй нэгжийн мэдээлэл авахад шаардлагатай цахим системийн үнэн зөв алдаагүй болгох, баяжилтыг тухай бүрт нь хийх, хяналт шалгалтын чиглэлээр хийх ажлуудын үндсэн хэсгүүдийг төлөвлөж төслийг боловсрууллаа.

Газар зохион байгуулалт, геодези, зураг зүйн ерөнхий газар