Иргэний пост

Орхон аймгийн 11 дүгээр цэцэрлэгийн багш нарын утсыг өглөө 8 цагаас орой 17 цаг хүртэл хурааж авдаг журамтай юм гэнэ. Бодвол ажлын бүтээмж нэмэгдэж, хүүхдэд тавих анхаарал сайжирдаг гэх тайлбар дагалдах байх. Гэхдээ тэд хэддүгээр зуунд амьдрана вэ. Гар утас гэх юм чинь харилцаа холбооны хэрэгсэл, хэрэглээ. Энэ ч утгаараа багш байна уу, дарга байна уу хэнбугайд ч хэрэгцээт эд. Аль эсвэл тухайн цэцэрлэг ар гэргүй, үр хүүхэдгүй багш нарыг ажиллуулдаг юм болов уу. Хэрэв багшийг ажлаа хийж байхад ар гэрт нь асуудал тулгарвал утсаа хураалгасан тэд ажил тартал ажиггүй суух ёстой юм байх. Хэний гаргасан, хэзээний шийдвэрийг мэдэхгүй ч үр хүүхдээ даатгаж үлдээсэн эцэг эхчүүд хариуцсан багштайгаа холбогдож чадахгүй хариу тайлбар хүсэхэд "цэцэрлэгийн удирдлага ажилдаа ирэхэд нь гар утсыг нь хурааж авдаг, ажил тартал өгдөггүй" гэсэн тайлбар өгчээ.

Үгүйсгэвэл эцэг эхээс залхсан багш ийм арга зохиосон ч байж мэднэ. Гэхдээ олон эцэг, эх бухимдан ярьж, багш ажилчид сэмхэн шивнэлдсэн яриа Монголын багш нарын үйлдвэрчний эвлэлд хүртэл дуулдсан байгааг бодвол хэрэгжээд эхэлчихсэн дүрэм бололтой. Уг нь бид чинь хойд Солонгост бус техник хөгжсөн 21 дүгээр зууны ардчилсан Монгол Улсад амьдарч байгаа хүмүүс биз дээ.