Засгийн газрын шийдвэрээр төрийн албан хэрэгцээнд ашиглаж байгаа автомашины улсын дугаарыг цэнхэр өнгөөр өөрчлөх шийдвэр гараад удаж байгаа. Өнөөдрийн байдлаар Орхон аймгийн төрийн албаныханы дийлэнх нь автомашины дугаараа солиогүй хэвээр байгаа. Ганц нэг байгууллага, тэр дундаа Өрхийн эрүүл мэндийн төвийн автомашиныг эс тооцвол дарга нар машины дугаараа өөрчлөх тун дургүй байгаа бололтой. 
Өнгөрсөн долоо хоногийн аймгийн Засаг даргын шуурхай зөвлөгөөний үеэр аймгийн Засаг даргын орлогч М.Түмэнжаргал “Хууль эрх зүйн хэлтсийн даргад тусгайлан үүрэг өгч, энэ ажлыг эрчимжүүлэхийг үүрэг болгосон”. Ямартай ч амралтын өдөр албаны машинаар зугаалдаг, хүүхдээ сургууль цэцэрлэгт зөөх, гэр бүлийнхэндээ унуулдаг дарга нарын албаны машины нуруу амрах цаг удахгүй бололтой. Харин Орхон аймагт төрийн алба, орон нутгийн өмчит газрын 304 том, жижиг автомашин бүртгэлтэй байна.