Аймгийн ИТХ-ын Зөвлөлийн ээлжит 13 дугаар хуралдаанаар хичээлийн шинэ жилийн бэлтгэл ажлын явцтай танилцсан билээ. Өнөөдрийн байдлаар бэлтгэл ажил сайн хангагдсан хэдий ч анхаарах хэд хэдэн асуудал байгааг Зөвлөлийн гишүүд болон аймгийн Засаг даргын орлогч А.Түвшинжаргал нар онцолж байлаа.                                      Зөвлөлийн гишүүн М.Түмэнжаргал “Нэг хувь сэтгүүлч хувийн сургуулийн төлбөртэй холбоотой мэдээлэл оруулчихаар төлбөр нь нэмэгдэж байх шиг байна. 0р нь ингэхэд аймгийн хэмжээнд сургалтын үйл ажиллагаа эрхэл байга хувийн сургуулийн төлбөрийн талаар хяналт тавьдаг уу. Төлбөр нэмэгдэж байгаа бол тэр талаараа эцэг эхчүүддээ болон олон нийтэд учир шалтгаан, нөхцөл байдлын талаараа мэдээлэл өгч бай л даа. Урсгалаараа л байх юм. Сургалтын төлбөртэй холбоотой мэдээлэл илүү нээлттэй дэлгэрэнгүй байх ёстой. Энэ тал дээр хариулт байна уу” хэмээн асуусан.

Аймгийн БШУГ-ын дарга О.Ариунгэрэлт “Одоогоор мэдээлэл алга байна” гэлээ.

Ер нь цахим орчинд хэн нэг хүн бусдын ятгалгаар, эсвэл тодорхой зорилгоор санаатай санаагүй мэдээлэл оруулсанаас болж иргэдийн дунд ойлгомжгүй байдал үүсгэдэг нь нэгэнт хэвшил болсон. Манай аймгийн хувийн сургуулиудын төлбөртэй холбоотой мэдээлэл ч үүний нэг жишээ. Хувийн сургуулийн төлбөр тухайн сургуульд сурч байгаа суралцагч, түүний асран хамгаалагч нарт л хамаатай. Тэд төлбөрийн асуудлаар сургуульдаа хандах учиртай. Түүнээс биш нэг сургуулийн төлбөрийн нэмэгдлийн талаар цахим орчинд оруулахад үзэн ядалт болж хувирдаг. “Шуналтай юмнууд, юу ч заадгүй мөртлөө үнээ нэмлээ, яасан гэж үнээ нэмж байгаа юм бэ” гээд л коммент нь хөвөрнө. Нийгэм хувийн сургуулийн, хувийн байгууллагыг үзэн ядна. Нөгөө талдаа хувийн сургуулиуд хичээлийн шинэ жилийн өмнө төлбөрийн нэмэгдлийн талаар нэг их зарлаад байдаггүй. Зах зээлээс хэрэглэгчээ татах, хуучин үйлчлүүлэгчээ өөрөөсөө холтгохгүй байх нь хувийн сургуулийн амбиц байдаг. Хичээл эхлээд тодорхой хугацаа өнгөрсний дараа сурагч, эцэг эхтэй гэрээ байгуулаад үнийн саналаа танилцуулаад тохиролцоод төлбөрийн асуудлаа шийддэг. Иймээс иргэдийн хувьд хувийн сургуулийн төлбөрийн нэмэгдэлтэй холбоотой асуулдлаа сургуулиасаа асуусан нь хамгийн зөв арга зам болох байх.