Аймгийн Засаг даргын шуурхай долоо хоног бүрийн даваа гарагийн 11:00 цагт Нутгийн удирдлагын ордны Амар сайдын нэрэмжит танхимд болдог. Шуурхайд аймгийн ЗДТГ-ын газар, хэлтэс, албадын удирдлага, Засаг даргын хэрэгжүүлэгч агентлагууд, босоо удирдлагтай орон нутаг дахь байгууллагын дарга нар хуралддаг. Сүүлийн үед аймгийн Засаг даргын шуурхайг ажиглаад байхад оролцож байгаа байгууллагын дарга нар Шуурхайн нэг цагийг өнгөрөөх гэж байж ядаж суух юм.

Утсаараа байнга мессеж бичнэ, утсаа маажна, тоглоом тоглоно, арай л +18 кино үзэхээс наахнуур шуурхайн нэг цагийг өнгөрөөж буй дүр зураг сэтгүүлчдийн гэрэл зургийн дуранд мөнхөрч байна. Бүр сүүлдээ энэ байдал даамжирч аймгийн Засаг даргын шуурхай Сонин уншлагын цаг болсон дүр зураг харагдаж эхэллээ. Социализмын үед байгууллага бүр долоо хоногт нэг удаа сонин уншлагын цаг гаргаж түүнийхээ талаар ярилцлага хийдэг байж билээ. Дарга нар үүнийг мөрөөдөөд, хүсээд байгаа юм болов уу.

Өнөөдрийн шуурхайд аймгийн Засаг дарга С.Батжаргал үүрэг даалгавар өгч, зарим асуудалтай нэр цохон танилцаж байхад ганц нэгээр тогтохгүй байгууллагын дарга нар утсаа маажаад, утсаа гөлрөөд, тоглоом тоглоод бүр таг сууж харагдсан. Нэгэнт л байгууллагын дарга нар шуурхайд оролцох үүрэгтэй байхад “шуурхайг сууж тасалдаг” нөхдүүдэд хариуцлага тооцдог удирдлага байна уу.  Сүүлдээ ах нар нь Шуурхайг “сууж тасалдаг” тэргүүн туршлагаа дүү нартаа өвлүүлсэн үү, Гаалийн газрын төлөөлөл болох дүү нар нь ч шуурхайн үеэр гар утсаар наадах шиг л болж байна.

Хаа очиж зарим төрийн байгууллагын дарга нар өгсөн үүрэг даалгаврыг тэмдэглэлийн дэвтэртээ бичиж авч үзэж цаас нийлүүлж суугаа нь ч байна. Үзэг цаас нийлүүлэх нь байтугай гар утсаа тас атгаж орж ирээд тоглоом тоглож, кино үзэж байгаад нэг цагийг арай гэж өнгөрөөгөөд нэг их ядарсан царайлаад Амарын танхимаас гардаг дарга нар олширвол манай аймаг хөгжих биш хөглөрөхийн цондон болох нь ээ.