Монгол банкны Орхон аймаг дахь салбрын удирдлага болон Орхон аймаг дахь  арилжааны 7 банкны удирдлага, аймгийн ЗДТГ-ын ХОХБТ-ын хэлтсээс хэвлэлийн бага хурал хийлээ. Монгол улсын Засгийн газраас Улаанбаатараас орон нутагт шилжин суурьшиж байгаа иргэдийг дэмжин Орон нутгийн иргэдэд зориулсан Орон сууцны санхүүжилтийн ипотекийн зээлийг олгож эхлээд байгаа билээ.

Зээлийн зорилго нь Улаанбаатар хотын төвлөрөлийг сааруулахад чиглэжээ. Улаанбаатар хот болон бусад аймаг, орон нутгаас Орхон аймагт шилжиж ирсэн иргэд энэхүү зээлд хамрагдах боломжтой аж. Нийтийн болон амины орон сууцанд орох иргэдэд уг зээлийг олгох юм байна. Нийтдээ 80 м кв-аас багагүй талбайтай, нийтийн болон амины орон сууцанд орсон иргэн 100 сая төгрөгийн энэхүү ипотекийн зээлийг авна. Зээлийн эх үүсвэрийн хувьд Монгол банк 80 хувийг нь үлдсэнийг нь арилжааны банкнууд өөрийн эх үүсвэрээс санхүүжүүлэх гэнэ.

Энэхүү ипотекийн зээлийн хувьд 6 хувьтай байх юм. Гэхдээ зээлдэгч эхний 3 жилд 3 хувийн хүүтэйгээр зээлийг авна. Үүний зөрүү болох 3 хувийг Засгийн газар татаас хэлбэрээр зээлдэгчийн нэрийн өмнөөс арилжааны банкуудад олгоно.

Зээлийн хугацаа 360 сар буюу 30 жил байх юм. Хэрэв зээлдэгчийн урьдчилгаа болох 30 хувь нь дутуу тохиолдолд Зээлийн батлан даалтын сангаас үлдэгдэл санхүүжилтээ авах боломжтой гэнэ. Улаанбаатар хот болон бусад аймаг, орон нутгаас Орхон аймагт шилжиж ирсэн, орлогоо нотлох боломжтой, зээлийн урьдчилгааг бүрдүүлсэн, өмнө нь ипотекийн зээлд хамрагдаж байгаагүй иргэн банкны шаардлагыг биелүүлсэн тохиолдолд зээл 2-5 хоногийн дотор судлагдаад олгогдох боломжтой талаар хэвлэлийн бага хуралд оролцогчид онцоллоо. Орон нутгийн иргэдэд зориулсан орон сууцны ипотекийн зээлийг 2023 оны 12 дугаар сарын 31-н хүртэл олгох юм байна.

Гурван хувийн зээлийн санхүүжилтийн хувьд хязгаарлагдмал байгаа учраас одоогоор тэр бүр хүссэн болгонд олгох боломжгүй байгаа гэнэ. “Хаан” банк, “Төрийн банк”-ны хувьд 3-5 хүнд 3 хувийн ипотекийн зээлийг олгоод байгаа гэнэ. Мөн дээр банкуудад тус бүрдээ 20 гаруй иргэн зээл авахаар хандаад байгаа, материал нь зээлийн судалгааны шатанд явж байгааг онцоллоо.