ХХҮГ-ын дэргэдэх Ахмадын сувилалын үйл ажиллагааг “ЭБИС” сэргээн засах клиникт шилжүүлэн “ахмад настан хөгжлийн бэрхшээлтэй хүний сэргээн засалтын төв” болгох саналыг өнөөдөр Засаг даргын зөвлөлийн хурлаар хэлэлцэн шийдвэрлэлээ. 
       Ингэснээр манай аймаг сэргээн засах тусламж үйлчилгээг цогцоор нь нэг доор үзүүлэх боломж бүрдэж байна.  
“ЭБИС” сэргээн засах клиник нь өдрийн сэргээн засах клиникийн чиглэлээр тусламж үйлчилгээ үзүүлэн ажилладаг бөгөөд Орхон аймагт энэ чиглэлийн үйл ажиллагаа явуулдаг ганц клиник ажээ. Тус клиник нь урт хугацааны сэргээн засах эмчилгээ шаардлагатай аливаа өвчин эмгэг, гэмтлийн болон насжилтын шалтгаант бие махбодийн хөдөлгөөн, үйл ажиллагаа, сэргээн засах тусламж үйлчилгээний менежментийг нэвтрүүлэн, мэргэжлийн баг ажиллаж байгаагаараа онцлогтой. 

      Ахмадын сувилал нь эмийн бус нөхөн сэргээх эмчилгээ хийгддэг бөгөөд нэг ээлжиндээ 25 хүртэл ахмад амраах хүчин чадалтай юм. Энэ нь нэг жилд 280-320 ахмад амарч сувилуулдаг гэсэн үг юм.  Тогтмол зардал, хоол болон бусад зардал, ажилчдын цалин гээд жилдээ улс болон орон нутгийн төсвөөс 180 сая төгрөг зарцуулдаг байна. Ашиглалтад орсон цагаас хойш буюу 1998 оноос хойш их засвар хийгдээгүйн улмаас барилгын хана цуурах, гадна пасад нурах, дээврээс ус гоожих зэрэг хүндрэл үүссэн байна.  Түүнчлэн боловсон хүчний хангалт, хуулийн холбогдох өөрчлөлтүүд, ажлын байрны засвар үйлчилгээ нөхцөл зэргээс шалтгаалан цаашид үйл ажиллагаа явуулахад хүндрэлтэй болж байгаа хэмээн дүгнэжээ.  
     Иймд дээрх хоёр төвийг нэгтгэн цогц үйлчилгээ үзүүлэх ахмад настан хөгжлийн бэрхшээлтэй хүний сэргээн засалтын төв болгон нэгтгэж ХХҮГ-ын дэргэдэх Ахмадын сувилалыг гэрээлэн эзэмшүүлэх хэлбэрээр “ЭБИС” сэргээн засах клиникт ашиглуулах, түрээсийн төлбөргүйгээр эзэмшүүлэх, тус төвийн үйл ажиллагаа жигдэртэл 2024 оны төсөвт шаардагдах зардлыг төлөвлөх гэсэн саналуудыг Засаг даргын зөвлөлийн хурлаар дэмжлээ. 

Мэдээллийн төв