Аймгийн Орон нутгийн Өмчийн газраас жил бүр түрээсийн үнийн хэмжээг тогтоох асуудлыг аймгийн ИТХ-д оруулж батлуулдаг. Хамгийн сүүлд хуралдсан аймгийн ИТХ-ын ээлжит XIV хуралдаанд Л.Оюунгэрэл даргатай аймгийн Орон нутгийн Өмчийн газрынхан Орон нутгийн өмчийн байрны 1 метр квадрат талбайн түрээсийн төлбөрийн доод жишиг үнийг батлуулахаар оруулсан юм.  

Мөн Эрдэнэт цэцэрлэгт хүрээлэнгийн гадна талбайн түрээсийн доод жишиг үнийг хэлэлцэн батлуулахаар танилцуулсан билээ. Төлөөлөгчид дээрх хоёр асуудалд нухацтай хандан асуулт асууж хариулт авлаа.

Орон нутгийн өмчийн газраас түрээсийн талбөрийн доод жишиг үнийг тогтоохдоо орон нутгийн онцлог, зах зээл дээрх хувийн хэвшлийн байгууллагын түрээсийн үнэ өртгийн талаар судалгаа хийжээ. Манай аймгийн хувьд Орон нутгийн өмчийн байрнуудад ихэвчлэн босоо удирдлагатай төрийн байгууллагууд түрээсийн үйл ажиллагаа эрхэлдэг байна. Үүнд, Газрын харилцаа, барилга хот байгуулалтын газар, Мэргэжлийн хяналтын газар, Байгаль орчин, аялал жуулчлалын газар, Мал эмнэлгийн газар, Сэлэнгэ голын сав газрын захиргаа гээд нэрлээд байвал урт дараалал үүснэ. Босоо удирдлагатай төрийн байгууллагууд өөрийн гасан байргүйгээс үүдэн Орхон аймаг, Эрдэнэт хотын иргэдэд төрийн үйлчилгээ хүргэхдээ орон нутгийн байранд түрээс төлж байрладаг. Түрээсийн байрны төлбөрийг тухайн байгууллагууд жил бүрийн төсөвтөө суутган  явж ирсэн. Энэ удаад орон нутгийн өмчийн байрны түрээсийн төлбөрт тодорхой хэмжээнд өөрчлөлт орсон учраас Төрийн байгууллагууд ирэх жилийн төсөвтөө үүнийг анхаарч, түрээсийн төлбөрөө суутгах учиртай. Энэ талаар хуралдаан даргалагч аймгийн ИТХ-ын дарга Д.Мөнхбатын зүгээс “ аймгийн Орон нутгийн Өмчийн албаныхан тогтоолын төсөл албажиж гармагц орон нутгийн өмчийн байрны талбайн түрээсийн төлбөрийн доод жижиг үнийн өөрчлөлтийн талаарх мэдээлийг албан тоотоор хүргүүлээрэй. Босоо удирдлагатай төрийн байгууллагууд түрээсийн төлбөрийн хэмжээ өөрчлөгдсөн талаарх мэдээллээ дээд байгууллагдаа хүргүүлэхийн зэрэгцээ ирэх 2024 оны төсөвтөө суулгах арга хэмжээ аваарай. Энэ талаар тэмдэглэлээр ч үүрэг өгнө. Ирэх жилийн эхээр түрээсийн төлбөр төлөх болохоор манайх боломжгүй, төсөвтөө суулгаагүй гэдэг асуудал байхгүй шүү. Энэ тал дээр анхаарч ажиллаарай” хэмээн сануулсан юм.