Жил бүрийн арванхоёрдугаар сарын 3-нд болдог  “Хөгжлийн бэрхшээлтэй хүний эрх”-ийг хамгаалах олон улсын өдрийг угтан ЗДТГ, ХХҮГ  хамтран “Хүртээмжтэй хөгжлийг дэмжих нь” нэгдсэн өдөрлөгийг зохион байгуулж байна. 
    Олон улсын өдрийг угтан ЗДТГ-аас уг олон улсын өдрийг угтан сарын аяныг өрнүүлж олон талт арга хэмжээ зохион  байгуулж байгаагийн нэг нь энэхүү өдөрлөг юм.   Өдөрлөгөөр хөгжлийн бэрхшээлтэй хүнийг тохирох ажлын байранд зуучлах, төр хувийн хэвшлийн хамтын ажиллагааг сайжруулах, хөгжлийн бэрхшээлтэй иргэдийн үйлдвэрлэсэн бараа бүтээгдэхүүнийг сурталчлах, эрүүл мэнд, боловсролын байгууллагуудын үйлчилгээг танилцуулж байна.  

Орхон аймаг ХБИ-н рүүгээ чиглэсэн олон ажлыг санаачлан хэрэгжүүлж, 680 гаруй сая төгрөгийг зарцуулжээ. Тэдгээрийн нэг нь орон нутгийн санхүүжилтээр ЗДТГ-аас хэрэгжүүлж буй “Тэгш боломж” төсөл юм. Боловсролын үйлчилгээнд хамрагдах хөгжлийн бэрхшээлтэй хүүхдийг тодорхойлж, тэдний өрх, өрхийн гишүүд, хамрагдаж буй сургуулиудын эрэлт, хэрэгцээ, санаачилга, боломжид тулгуурлан “БОЛОВСРОЛД БЭЛТГЭХ, БОЛОВСРОЛЫН ҮЙЛЧИЛГЭЭ АВАХАД НЬ ДЭМЖЛЭГ ҮЗҮҮЛЭХ” нь энэхүү төслийн зорилго.

     Мөн  Хөгжлийн бэрхшээлтэй хүний эрхий тухай хуулийн  32 дугаар зүйлийн 32.2-т хувийн туслах үйлчилгээ, зөвлөлдөх бүлэг буюу харилцан суралцах, зөвлөгөө өгөх үйлчилгээгээр хөгжлийн бэрхшээлтэй хүний бие даан амьдрах эрх нь хангагдана гэж тусгасан байдаг.   2016 онд баталсан хуулийн хэрэгжилтийг Орхон аймаг  хангаж  орон нутгийн төсвөөс  64 сая төгрөгийн санхүүжилтийг  шийдвэрлэн “Хүмүүн бие даан амьдрах  төв” ТББ-тай хамтран хөгжлийн бэрхшээлтэй  иргэн хувийн туслах үйлчилгээ авах төслийг 21 аймгаас анхлан  хэрэгжүүлж байгаа билээ. Энэ мэтчилэн  ХБИ-рүү чиглэсэн, тэднийг дэмжсэн бусад аймаг орон нутагт жишиг болохуйц олон төсөл, хөтөлбөрийг хэрэгжүүлж байна.