Аймгийн ИТХ-ын Зөвлөлийн хурал болж 10 шахам асуудлыг хэлэлцлээ. Хэлэлцэх асуудлын дунд “Цагаан тоосны дэгдэлт, сөрөг нөлөөллийг бууруулах хөтөлбөр”-ийн 2021 оны хэрэгжилтийн тайлан гэсэн асуудал багтсан. Гэвч “Эрдэнэт үйлдвэр” ТӨҮГ-ын холбогдох албаны хүмүүс гадаадад албан томилолтой яваа учир энэ удаад асуудлыг хойшлуулсан билээ. Энэ үеэр аймгийн ИТХ-ын Зөвлөлийн гишүүн Б.Мягмарсүрэн “ Цагаан тоосны асуудлыг жил бүрийн хавар намар хэлэлцдэг байя. Сүүлийн жилүүдэд цагаан тоос иргэдийн амьдралд түйрэн л болж байна шүү дээ. Өвөл, зуны улиралд цагаан тоосны дэгдэлт буурдаг. Энэ үед яриад нэмэргүй. Хүмүүсийн анхаарал ч суларна. Цагаан тоосны талаар ГОК-ынхон ирээд баахан худлаа ярина. Ажил хийж байгаа байх. Гэхдээ ямар ч үр дүнгүй ажил болж байна. Иргэдийн төлөө хийсэн ажил харагдахгүй байна. Иймээс жилийн эхнээс төлөвлөөд ГОК-ынхныг байлгаад нухацтай ярих хэрэгтэй” гэлээ.
