Төрийн болон орон нутгийн өмчийн үзлэг тооллогыг 2020 онд явуулахаар Засгийн газрын тогтоол гарсан ч дэлхий нийтэд гарсан цар тахлын улмаас 2 удаа хойшилсон байдаг. Тэгвэл энэ жил төрийн болон орон нутгийн өмчийн улсын үзлэг тооллого орон дяаар болх гэнэ. Энэ ажилтай холбоотойгоор Төрийн өмчийн бодлого зохицуулалтын газар, аймгийн ЗДТГ, Орон нутгийн өмчийн газраас хамтран “Төрийн болон орон нутгийн өмчийн 2022 оны улсын үзлэг тооллого” сургалт зохион явууллаа. Сургалтад аймгийн Засаг дарга С.Батжаргал, Төрийн өмчийн бодлого зохицуулалтын газрын Төрийн өмчийн бүртгэл ашиглалтын хэлтсийн дарга Д.Нарангэрэл, төрийн болон орон нутгийн өмчит байгууллагуудын удирдлагууд, мэргэжилтэн албан хаагчид оролцлоо. Энэ удаагийн Төрийн болон орон нутгийн өмчийн эд хөрөнгийн улсын үзлэг, тооллогын зорилго нь

*** Хөрөнгийн чанар байдал, хамгаалалт, үнэлгээ, бүртгэлд үнэлэлт өгөх,

*** Засгийн газрын шийдвэр, аргачлалын дагуу хийсэн дахин үнэлгээний дүнгээр гарсан зөрчил дутагдлыг арилгасан байдлыг хангах,

*** Тооллогын дүнгээр төрийн болон орон нутгийн өмчит болон өмчийн оролцоотой хуулийн этгээдийн мэдээллийг улсын бүртгэлийн мэдээлэлтэй тулган баталгаажуулахад чиглэсэн байна.

Сургалтын нээлтийн үеэр аймгийн Засаг дарга С.Батжаргал “Монгол Улсын Төрийн болон Орон нутгийн өмчийн тухай хууль 1996 онд батлагдсанаар орон нутаг өөрийн гэсэн өмчтэй болох эрх зүйн орчин бүрдсэн. 1997 онд төрийн өмчийн тооллогыг улс орон даяар анх удаа зохион байгуулж, аймаг, нийслэлийн өмчлөлд эр хөрөнгө шилжүүлэх тухай УИХ-ын 29 дүгээр  тогтоол 1999 оны гуравдугаар сард гарч байв. Ингэснээр манай аймаг 61 байгууллага 11.6 тэрбум төгрөгийн үндсэн хөрөнгө төрийн өмчлөлөөс орон нутгийн өмчлөлд шилжин ирснээр өөрийн мэдлийн өмч хөрөнгөтэй түүнийгээ захиран зарцуулах эрхтэй болсон” гэлээ.

2021 оны жилийн эцсийн байдлаар Орхон аймаг орон нутгийн төсөвт 99 байгууллага 473.9 тэрбум төгрөгийг хөрөнгөтэй гэж бүртгэгджээ. Төрийн өмчийн бодлого зохицуулалтын газрын тогтоолоор баталсан журам, маягт зааврын дагуу үнэн зөв бөглөж, түргэн шуурхай явуулж дүн мэдээгээ ирэх зургадугаар сарын 10-ны дотор хүлээлгэн өгөх юм байна.

Төрийн болон орон нутгийн өмчийн тухай хуулийн 70 дугаар зүйлийн 4 дэх хэсэгт заасны дагуу Засгийн газрын бүрэн эрхийн хугацаа эрхэлсэн анхны жилийн IY  улиралд багтаан 4 жилд нэг удаа Төрийн болон орон нутгийн өмчийн эд хөрөнгийн улсын тооллогыг явуулна гэж заасны дагуу зохион байгуулж байна. 2016 онд явагдсан тооллогоор нийт 6086 хуулийн этгээдэд нийт 30 их наяд төгрөгийн хөрөнгө тоологджээ.

Орон нутгийн Өмчийн газраас аймгийн хэмжээний төр, төсвийн байгууллагын удирдлага, нягтлан няравуудад кориулсан нэгдсэн сургалтыг “Уурхайчин” соёлын ордны их танхимд зохион байгуулсан юм. Харин үдээс хойш аймгийн ЗДТГ, Татварын хэлтэс, Мэдээлэл харилцаа холбооны сүлжээ компани зэрэг 4 газарт мэргэжилтнүүдэд зориулсан онлайн сургалтыг зохион байгуулж, мэргэжил арга зүйн зөвлөгөө өгсөн юм.