Аймгийн Засаг даргын Зөвлөлийн ээлжит тавдугаар хурлаар “Эрдэнэт хотын хүндэт иргэн” шалгаруулах журманд өөрчлөлт оруулах асуудлыг хэлэлцэв. Аймгийн ЗДТГ-ын Төрийн захиргаа, удирдлагын хэлтсийн дарга Ш.Ганболд “2006 онд Эрдэнэт хотын 30 жилийн ойгоор Эрдэнэт хотын хүндэт иргэн шагнал бий болсон. Тэр үеэс хойш энэ шагналаар 40 хүн шагнуулжээ. Энэ хугацаанд зарим жил нэг ч хүн шагнаагүй байна. Тухайлбал, 2009, 2010, 2015 онд нэг ч хүн шагнаагүй. Мөн зарим онд 5 хүнийг ч шагнасан байдаг. Жишээ нь, 2014, 2016, 2018 онд тус бүр 5 иргэнийг шагнаж байжээ.  2019 оны 11 сарын 25-ны өдрийн аймгийн ИТХ-ын Тэргүүлэгчдийн 125 тоот тогтоолоор жилд 3 хүнийг л шагнахаар журамласан. Өнөөдөр энэ журманд өөрчлөлт оруулах зайлшгүй шаардлага гарч байна. Монгол улсын Засаг захиргаа, нутаг дэвсгэрийн нэгж, түүний удирдлагын тухай хуульд өөрчлөлт орж 2022 оны нэгдүгээр сарын 1-нээс мөрдөж байгаа. Энэ хуулийн бараг 90 хувь нь өөрчлөгдсөн. Хуульд зааснаар одоо аймгийн ИТХ-ын Тэргүүлэгч гэж байхгүй болсон. Аймгийн ИТХ-ын Зөвлөл гэж бий болсон. 2019 оны аймгийн ИТХ-ын Тэргүүлэгчдийн 125 тоот тогтоолын зарим заалт өөрчлөгдсөн. Энэ мэт шалтгаанаар журманд өөрчлөлт оруулахаар болоод байна. Энэ шагналын хувьд ихээхэн онцлогтой. Монгол улсын төрийн дээд одон медальд Төрийн бус байгууллага, Холбоод нэр дэвшүүлдэг. Түүнтэй ижил Эрдэнэт хотын хүндэт иргэн шагналд манай аймгийн төрийн байгууллага болон ТББ, Холбоод нэр дэвшүүлдэг. Энэ журманд орсон нэг өөрчлөлт нь нэр дэвшүүлж байгаа төрийн болон ТББ, холбоод нэр дэвшигчийн материалаа зөвхөн Баян-Өндөр, Жаргалант сумын Засаг даргад гаргана. Сумын Засаг даргын Зөвлөл нь сумын ИТХ-ын Зөвлөлтэйгээ хамт хуралдаад зөвхөн 3 хүртэлх хүний нэрийг л оруулж ирнэ. Нэг  хүн ч байж болно. Үүний дараа сумын Засаг даргаас ирүүлсэн нэг ч бай 3 ч бай хүний материалыг судалж үзээд аймгийн Засаг даргын захирамжаар шагнадаг болно” гэлээ.

Аймгийн Засаг даргын Зөвлөлийн гишүүд журмын өөрчлөлттэй танилцаад дэмжсэн юм. Харин Эрдэнэт хотын хүндэт иргэн шагналыг улсын баяр наадмаар олгох уу, Эрдэнэт хотын өдрөөр гардуулах уу гэдгээ тухайн жилдээ л аймгийн Засаг даргын Зөвлөлийн хурлаар шийдэх гэнэ.

“Эрдэнэт хотын хүндэт иргэн” шагналыг 1 сая төгрөг дагалддаг байна. Эрдэнэт хотын хүндэт иргэн нь Орхон аймгийн дотор Нийтийн тээврээр үнэгүй зорчих, Эрүүл мэндийн байгууллагаар үйлчлүүлэхдээ дугааргүй шууд үзүүлж, харуулах эрх эдэлдэг байна. Мөн “Эрдэнэт хотын хүндэт иргэн” бие барсан тохиолдолд түүний ар гэр, үр хүүхдэд нь 1 сая төгрөгийн мөнгөн тусламж үзүүлдэг ажээ.