Засгийн гарын хуралдаанаас сурагчдын амралтыг 7 хоногоор сунгаж хоёрдугаар сарын 14-нөөс танхимаас хичээллүүлэх шийдвэр гаргажээ. Харин нийслэлийн хувьд хичээлийг танхим, цахим хосолсон хэлбэрээр 5/9 зарчмаар хичээллүүлэн хоёрдугаар сарын 28-наас 100 хувь танимаар хичээл орох юм. Хөдөө, орон нутгийн хувьд хоёрдугаар сарын 14-нөөс танхимаар хичээллэхээр боллоо.

Энэ талаар Боловсрол, шинжлэх ухааны сайд Л.Энх-Амгалан мэдээлэл хийхдээ “Нэг зүйлийг уриалмаар байна. Хэрвээ хоёрдугаар сарын 14-нд хичээл сургалтыг эхлүүлэхийг хүсэж байгаа бол Цагаан сараа гэр бүлийн орчинд, аль болох хязгаартайгаар баярлаасай гэж хүсэж байна. Дахиад хичээл сургуулийн асуудал хойшлох эрсдэл ч бий" хэмээн анхаарууллаа.

Их, дээд сургууль болон Мэргэжил, сургалтын үйлдвэрлэлийн төвийн оюутан сурагчид хоёрдугаар сарын 7-ноос хичээллэж эхэлнэ. Ингэхдээ мөн танхим, цахим сургалтыг хослуулж явах ажээ.