Монгол улсын Ерөнхийлөгч У.Хүрэлсүхийн “Засгийн газарт чиглэл өгөх тухай” зарлиг гарч монголчууд бүх нийтээрээ нэг тэрбум мод тарихаар болсон. Цөлжилтийн эсрэг, ирээдүйнхээ төлөө хийж байгаа энэ ажилд 45 жилийн түүхт ойгоо энэ жилийн турш тэмдэглэж байгаа орхончууд хувь нэмрээ оруулахаар “Эрдэнэт цэцэрлэгт хүрээлэн”-д “Тэрбум мод тарих үндэсний хөдөлгөөн”-ий нээлтээ хийв. Энэ ажлын хүрээнд манай аймгийн хувьд  нийт газар нутгийн 3 хувьтай тэнцэх хэмжээний газарт 10 сая ширхэг мод тарьж ойн зурвас, ойн төгөл, ойжуулалт, ойн нөхөн сэргээлтийн ажлыг 2030 он хүртэлх хугацаанд зохион байгуулахаар боллоо. Мэргэжлийн байгууллагуудын зүгээс уг ажлын төлөвлөлтийг хийсэн байна.

            Цаашид ойн сангийн доройтолд өртөж байгаа ойд хортон шавьжийн устгал хийх, хожуулыг нь цэвэрлэх, оронд нь шинээр мод тарьж ойжуулах ажил хийгдэнэ. 2018 онд аймгийн хэмжээнд ойн сангийн судалгаа хийхэд Баян-Өндөр сумын ойн санд 639 га талбайд, Жаргалант сумын ойн сангийн 401 га талбайд ойжуулалт зайлшгүй хийх судалгаа гарчээ. Баян-Өндөр сумын гэр хорооллын 14 багт 15 мянган хашаа бүхий айл өрх хашааны талбайнхаа 30 орчим хувьд мод тарьж ногоон байгууламж бий болгоход 400 мянган ширхэг модны тарьц шаардлагатай. Иймээс аймаг, орон нутгийн бодлогод мод үржүүлгийн газруудыг дэмжих бодлого тусгагджээ.  2021 онд бүх нийтээр мод тарих ажлын хүрээнд 200.000 ширхэг мод, бут, сөөг тарьж ургуулах зорилт тавьснаас хаврын мод тарилтаар 113 мянган ширхгийг нь тарьж ургуулаад байна. Энэ намрын мод тарилтаар эрдэнэтчүүд нэмж 87 мянган мод тарих гэнэ.

“Тэрбум мод тарих үндэсний хөдөлгөөн”-ий нээлтийн ажиллагаанд Орхон аймгийн Засаг дарга С.Батжаргал, Засаг даргын орлогч А.Түвшинжаргал, БОАЖГ-ын дарга С.Жаргалсайхан, Баян-Өндөр сумын Засаг дарга Б.Баасансүрэн нарын албаны хүмүүс оролцлоо.  “Эрдэнэт цэцэрлэгт хүрээлэн”-д аймгийн удирдлагууд, багийн, иргэд мод тарьснаар “Тэрбум мод тарих үндэсний хөдөлгөөн” Орхон аймагт ийнхүү эхэллээ.

Мод тарих энэхүү ажил нь Монгол улсын “Алсын хараа-2050” урт хугацааны хөгжлийн бодлого, Засгийн газрын 2020-2024 оны үйл ажиллагааны хөтөлбөр, “Орхон аймаг, Эрдэнэт хотын Ногоон тогтвортой хөгжлийн зорилт-2050”, “Орхон аймаг, Эрдэнэт хотын таван жилийн үндсэн чиглэл” гэх мэт бодлогын баримт бичигтэй уялдаж байгаа юм.