Хичээл эхэллээ, нэгдүгээр микрийн хүүхдүүд халуун усанд ч олигтойхон орж чадсангүй шинэ хичээлийн жилээ угтлаа. Үүний балаг нь улс төрчдийн хэлдэг “Бүтээн байгуулалт” нэртэй газар шороо ухсан, сэндийчсэн, зам хаасан ажил. 

Нэг байгууллага нь Захиалагч болж нөгөө нь Гүйцэтгэгч нэртэй дарга цэргийн харьцааны, хамтын ажиллагаа Зэст багийн иргэдийг төдийгүй дөрөвдүгээр хорооллын айл өрхийг ч халуун усгүй хичээлийн жилийг угтуулж байна. Өнөөдөр  2021-2022 оны хичээлийн шинэ жилийн нээлтийн өдөр. Орчин цагийн Монгол улсын хувьд Боловсролын салбарын 100 жилийн ой тохиож байгаа. Нэг үгээр хэлбэл, монголчууд 100 дахь хичээлийн шинэ жилийн нээлтээ хийсэн. Гэтэл Эрдэнэт хотын нэгдүгээр микр, албан ёсоор бол Баян-Өндөр сумын Зэст багийн хүүхдүүд шинэ хичээлийн жилийн нээлтэндээ явах гэж хөл хөөр болж байхад халуун усгүй 67 дахь хоногтойгоо золгож байна. Халуун усанд ч орох эрхгүй амьдарч байна, энэ багийн хүүхдүүд. “Уурхайчин 1,2,3 дугаар хорооллын гадна шугам, дэд бүтцийн ажил” хэмээх албан ёсны нэртэй бүтээн байгуулалт зуны гурван сарыг дуусгаад намрын эхэн сарыг дамнаад үргэлжилсэн ч өнөөг хүртэл Зэст багийн оршин суугчид халуун усгүй түмпэн саванд толгой түрийгээ угаасан болоод сууж байна. Ажлын захилагч нь “Эрдэнэт үйлдвэр” ТӨҮГ. Харин гүйцэтгэгч нь “Тавин лан” ХХК. Бүтээн байгуулалтын эхлэх хугацаа 2021 оны дөрөвдүгээр сарын 30, дуусах хугацаа нь энэ оны есдүгээр сарын 15 байна хэмээн албан ёсны мэдээлэлд дурджээ.

Ямарч байсан наймдугаар сарын 31-ний өдөр захиалагч байгууллага, Гүйцэтгэгч компанийн удирдлагыг байлцуулан аймгийн ИТХ-ын дарга Д.Мөнхбат, Засаг дарга С.Батжаргал, Хотын захирагчийн албаны дарга С.Ганцогт болон албаны хүмүүс газар дээр нь ажилласан. Хурлын даргын хувьд гүйцэтгэгч байгууллага болох “Тавин лан” компанийнханд “Ажлын мэдээллээ иргэн, олон нийтэд ил болго. Иргэд мэдээлэлгүй байна. Түүнээс болж бухимдаж байна. Аргагүй зүйл. Ажлын бүтээмжийг нэмэгдүүлэхийн тулд ээлжийн зохион байгуулалт хий. Хүн хүчээ нэмэгдүүл. Та нарт хамаг учир байна” хэмээлээ.

“Эрдэнэт үйлдвэр” ТӨҮГ-ын Ерөнхий захирал Х.Бадамсүрэн “Захиалагч болон Гүйцэтгэгч байгууллагын хооронд ажлын гэрээ байгуулан ажил эхэлсэн. Ажлын явцад хүндрэл гарч эхэлсэн. Ажлын объём бараг хоёр дахин нэмэгдсэн. Түүний хэрээр хөрөнгө зардал гарч байгаа. Энэ бүхэн гэхдээ асуудал биш. Үйлдвэр нийгмийн хариуцлагынхаа хүрээнд хотынхоо дэд бүтцийн ажилд хөрөнгө гаргаж байгаа. Барилга, захиалагчийн албаныхан газар дээр нь ажиллахад нэмэлт ажил гарч байна. Энэ бүхнээс хүндрэл үүссэн. Манай холбогдох инженер, техникийн ажилчид захиалагчийн хяналтаа тавиад ажиллаж байна” хэмээсэн юм. Харин Гүйцэтгэгч байгууллага болох “Тавин лан” ХХК-ийн удирдлага “Труба хоолойнууд дөнгөж 7 хоногийн өмнө ирсэн. Дулааны станцын талд манайх тохируулга, хяналт хийх хугацаа хуваариа гаргаж өгсөн. Хил гаалиас шалтгаалаад ажил удааширсан. Манайх өнөөдөр 200 ажилтантай ажиллаж байна. Ойрын хугацаанд төв зам дагуух хэсгийн хэрэглээний халуун усыг өгөх боломжтой” гэв.

Ямар байсан талуудын байр суурийг сонссоны дараа аймгийн Засаг даргын зүгээс “Тавин лан” ХХК-д 1, 2 дугаар бичил хорооллын айл өрхийн халуун усыг 9 дүгээр сарын 15-н гэхэд өгөх үүрэг даалгавар өглөө. Есдүгээр сарын 15-нд халуун ус ирэх нь үнэн л байгаасай билээ.