Аймгийн Засаг дарга С.Батжаргал энэ үгийг өөрийн удирддаг Шуурхайн үеэр хэллээ. Өнөөдрийн шуурхайг  аймгийн Засаг дарга С.Батжаргал өрөөнөөсөө цахимаар удирдав.

Шуурхайн эхэнд үүрэг даалгаврын биелэлт, 70353511 тоот утсанд иргэдээс ирүүлсэн өргөдөл гомдол, санал хүсэлтийн талаар сонсдог. Уламжлал ёсоор аймгийн Засаг дарга дээрхтэй танилцаад “Иргэдийн санал хүсэлт, өргөдөл гомдлыг хүлээн авах 70353511 утсанд ийм цөөхөн мэдээлэл ирнэ ч гэж юу байхав. Энэ утсаа иргэдэд илүү нээлттэй болгоё. Энэ утсыг хэдхэн хүн л мэддэг. Энэ утсыг цахим болгох тал дээр бодлого гаргаж, ухаалаг болгоё. Иргэнд  хэрэгтэй мэдээлэл өгөх хүн олон бий. Тэдний мэдээллийг ч оруулах хэрэгтэй” хэмээн асуудалд шүүмжлэлтэй хандсан.

Иргэдийн санал хүсэлт, өргөдөл гомдлыг хүлээн авах 70353511 утсыг одоогоос найман жилийн өмнө АН-ынхан эрх барьж байхдаа эрдэнэтчүүдтэйгээ  ойр, нээлттэй байх гэж санаж сэдсэн бүтээлч ажил байлаа. Ардын Засгийн үед буюу 2016-2020 онд энэ төвийг татан буулгаж, оромдох төдий 70353511 тоот утсыг нь үлдээсэн. Харин С.Батжаргал даргын толгой сийрэг, хүний үгийг хүлээн авдаг, шүүмжлэл сонсдог тулдаа аргагүйн эрхэнд дээрх үгийг дарга нарт зориулан хэлж байхав.  “Төрийн чих онгорхой, иргэдээ сонсдог байх тал дээр АН-ынхан илүү байж. Харин өнөөдөр энэ утас ор нэр төдий, харин аймгийн Засаг даргыг, төрийг хуурай магтан дуулахын тулд өнөөх төвийг татан буулгаад дарга нарыг магтах, үйл хэргийг нь сайшаах, дөвийлгөх зорилготой бүхэл бүтэн “мэдээллийн агент” ажиллаж байхав.

Ямар ч байсан өнөөдрийн шуурхайн үеэр С.Батжаргал дарга гурван ч удаа “...хэвлэлийнхэн энэ асуудлаар тодруулга аваад өгөөч, анхаарлаа хандуулаач, хэвлэлийнхэнд тэр, тэр дарга мэдээллээ өг” гэж байсан нь асуудал тэгтлээ дор орчихоогүй гэдэг итгэл төрүүлж байна.