Арванхоёрдугаар сарын 5-ны өдрийн байдлаар манай улсын төмөр замын дагуух 5 аймаг, Улаанбаатар хот болон Архангай аймагт КОВИД-19-ийн өвчлөл бүртгэгдэж, төмөр замын дагуух бүс нутгаас нэг аймаг руу голомтын хүрээ тэлсэн байна. Манай улсад бүртгэгдсэн КОВИД-19-ийн өвчлөлийн насны бүтцийг харахад 30-39-насны залуучууд илүүтэй өвчилжээ.
Нийгмийн харилцаанд идэвхтэй оролцдог 20-49 насныхан өртөж байгаа нь олон нийтийн дунд халдвар эрчимтэй тархах эрсдэлтэйг харуулж байна.
Коронавирусийн халдвар иргэдийн дунд тархах эрсдэл өндөр байгааг автобусны жолоочийн кэйсээс харж болно. Ялангуяа, манай улсад хүн хоорондын зай барихгүйгээс халдварт өртөх тохиолдол дэлхийн дунджаас хоёр дахин өндөр байгааг ЭМЯ мэдээлсэн. Иймд хүн хоорондын зай барьж, амны хаалтаа тогтмол зүүж, халдварт өвчнөөс сэргийлэхийг мэргэжлийн байгууллагууд сануулсаар байна.
Сэлэнгэ аймгийн Онцгой комиссын 6-ны мэдээллээр 4 тохиолдол нэмж илэрч Covid-19 халдварын батлагдсан тохиолдол нийт 201 болсон юм. Хамгийн өндөр халдвар нэг дор бүртгэгдсэн Сэлэнгэ аймгаас харахад идэр насныхан илүү өвчилж байгаа аж. Сэлэнгэ аймагт батлагдаж байгаа тохиолдлуудаас харахад Covid-19 халдвар нь архаг хууч өвчтэй, өндөр настан болон биеийн дархлаа сул иргэдэд хурдан хугацаанд илэрч байна. Харин идэр насныханд 2-3 дахь давтан шинжилгээгээр 10-20 хоногт халдвар илэрч байгаа нь хамгийн анхаарал татаж байна. Орхон аймагт бага насны хүүхдүүдэд халдвар бүртгэгдсэн нь олон тохиолдсон. Короновирусын халдвараар хүүхэд, залуучууд олноор өвчилж байгаа нь тэдний эрүүл мэндэд суурь өвчлөл үүсэх магадлалтай гэдгийг эрдэмтэн судлаачид бичиж байна. Хамгийн ноцтой үр дагавар нь бие эрүүл залуу хүний халдварын илрэх хугацаа 2-3 удаагийн давтан шинжилгээний дараа 20 дахь хоногтоо илэрч байгаа нь халдварын тархалтыг хумихад хүндрэлтэй байгаа аж.