ЭДЦС” ТӨХК-ийн гүйцэтгэх захирал О.Ганбаатар Айлчлан ирж буй “Муу нүүрт” хэмээх гал бичин жилийн мэндийг Орхон аймгийн иргэд та бүхэндээ хүргэн мэндчилж байна. Улиран одож буй модон хонин жилд манай хамт олон 153.7 сая кВт.ц цахилгаан эрчим хүч үйлдвэрлэж , төлөвлөгөөг 100,3 хувиар, 128 сая кВт.ц цахилгаан эрчим хүч түгээж төлөвлөгөөг 100.9 хувиар, 537.2 мян Гкал дулаан эрчим хүч түгээлтийг 100.3 хувиар давуулан, зорилтот түвшингийн төлөвлөгөөг 100 хувь биелүүлж аваарь осол, саатал гаргаагүй ажилласнаар “Эрчим хүчний салбарын тэргүүний компани”-иаршалгарсан. “Эрдэнэтийн дулааны цахилгаан станц” ТӨХК-ийн хүчин чадлыг СС-50 МВт-ын турбин генератораар өргөтгөх, зарим тоног төхөөрөмжийг шинэчлэх ажлыг БНХАУ-ын төрийн өмчит Hunan Industrial Equipment Installation компаниар хийлгэх гэрээнд 2015 оны арванхоёрдугаар сарын 9-ний өдөр гарын үсэг зурж ажлыг эхлүүлснээр үйлдвэрлэлийн хүчин чадлыг гурав дахин өсгөж, Эрдэнэт хотын дулааны эрчим хүчний хэрэглээг ойрын 25-40 жилд бүрэн найдвартай хангах нөхцлийг бүрдүүллээ. Төрийн өмчийн хороотой байгуулсан “Өмч эзэмшлийн гэрээ”-ний үүргээ “Бүрэн хангалттай” биелүүлж Монгол улсын төрийн өмчийн компаниудаас тэргүүн байранд шалгарсан амжилтаар хуучин оноо үдэж байна. Айлчлан ирж буй XYII-р жарны “Муу нүүрт” хэмээх Гал бичин жилд төр маань түвшин, түмэн олон маань амар амгалан байж, эх орны минь хөгжил дэвшил ахицтай, амжилт бүтээл арвин байхыг хүсье. Эрдэнэт хотын нийт ард иргэд, мэргэжил нэгт салбарынхан, нийт хэрэглэгчид, “ЭДЦС” ТӨХК-ийн хамт олондоо элгээрээ энх амгалан, төрлөөрөө төвшин сайхан, юу санасан есөн цагаан хүсэл нь сэтгэлчлэн бүтэхийн өлзийтэй ерөөлийг өөд өөд нь өргөн дэвшүүлье. Сар шинэдээ сайхан шинэлээрэй.