Сошиал ертөнцийнхөн нэгэн сонирхолтой мэдээллийг түгээсэн байдаг. “Монгол улсын төрийн данс нь Шилэн Засгийн газрын Сангийн сайд нь Болор учраас манай улс галзуу хөгжих нь ээ” хэмээсэн жиргээнээс харвал нэгийг хэлээд байх шиг. Гэтэл үнэн хэрэг дээрээ Сангийн сайд Б.Болор шилэн дансаа нэвт хараад Эрдэнэтчүүдийг “дээрэмджээ”. Аравдугаар сарын эхээр Сангийн яамны зүгээс төр, төсвийн байгууллагуудын бүхий л харилцах данс, тэр бүү хэл аймаг, орон нутгийн сангуудын гүйлгээг хааж байсан. Ямар сайндаа л энэ үеэр манай аймгийн дарга нар “төрийн төлөө зүтгэхийн тулд машиныхаа бензины мөнгийг халааснаасаа гаргаж байгаа”-гаа гайхаж шуугисан. Уг нь бензингүй бол хоёр зээрдээрээ туухад асуудал амархан шийдэгдэх байтал заавал машин унаад гэр ажил хоёрын хооронд давхидаг “ямбатай ямаа” болсон дарга нар хувийнхаа мөнгөөр авсан бензин талоноо эхнэрийнхээ зурагнаас ч илүү нандигнан хадгалж байгаа тухай дуулдаж байна. Ийнхүү нэг хэсэгтээ бүх дансаа хаалгасан төсвийнхөн одоо ч гэсэн зутруу, гундуухан, өнгө муутай байгаа гэнэ. В.Сумъяасүх даргын шийдвэрээр аймгийн ЗДТГ-ын халаалтыг багасгасан,  утас, интернэтийн зардалаа хэмнэхийн тулд салгуулсан, ариун цэврийн өрөөний цаасны төсвийг хуу танасан, цалингаас өөр мөнгө гаргахгүй тухай мэдээлэл байна. Энэ хугацаанд Б.Болор сайдад “дээрэмдүүлсэн” мөнгөнийхөө араас аймгаараа хөдлөөд ч авч чадахгүйд хүрч аргаа барахдаа уран арга, мэргэн ухаанаа уралдуулсан дуулдана. Аймгийн ИТХ-ын дарга Б.Мягмарсүрэн Сангийн сайд Б.Болортой үй зайгүй найз учраас аймгийн 100 гаруй мянган иргэнийхээ төлөө нийслэлийн зүг хүлгийн жолоо залж учир байдлаа танилцуулан, танил талаа ашиглан хэдэн төгрөгөө олж ирэх гэж байгаад цасанд боогдон золтой л хөл гарын хуруугаа хөлдөөчихөлгүй замын дундаас эргэн ирсэн сурагтай. Өнөөдрийн байдлаар “Орон нутгийн хөгжлийн сан”, “Орон нутгийн хөрөнгө оруулалтын сан”, ”Эрдэнэт сан”, “Аймгийн Засаг даргын нөөц сан”, “Авто замын сан” зэрэг олон санг Сангийн яамнаас эрхийг нь нээхгүй байгаа талаар дарга нар ам уралдан аян шалтаг заан шаагиж байна. Б.Болор сайдын аравдугаар сард гаргасан шийдвэрийн дагуу манай аймгийн дээрх олон сангийн эрхийг хааж тэнд байгаа 20 гаруй тэрбум төгрөгийг төсвөөс татаас авдаг аймгуудын төрийн албан хаагчид болон тэтгэвэрийнхний мөнгөнд зарцуулсан бололтой. Улсаас татаас авдаггүй Орхон, Өмнөговь, Сүхбаатар гурван аймгийн дансыг нь хааж байгаад хийсэн Сангийн яамны энэ “дээрэм” орон нутгийнханы хувьд уур бухимдлыг нь хүргээд байгаа. Манай аймгийн хэмжээнд 20 гаруй тэрбум төгрөгийн хөрөнгө оруулалт, бүтээн байгуулалтын ажлын хөлс одоо болтол тодорхойгүй хугацаагаар царцчихсан, хувийн хэвшлийнхэн өдөр бүр мөнгөө сураглахаар аймгийн дарга нар, Санхүү, төрийн сангийн хэлтсийнхэн “Сангийн яам данс нээгээгүй байгаа” гэдэг үгийг тоть мэт давтсаар хоёр сарын нүүр үзэж байна. Хамгийн сүүлийн мэдээллээс харвал Өмнөговь, Сүхбаатар аймгийн Засаг дарга Ж.Бадраа, Ж.Батсуурь нар дээгүүр доогуур гүйж байгаад дансуудаа нээлгэж, Сангийн яамнаас авах ёстой хэдэн арван тэрбум төгрөгөө авсан байна.  Гэтэл манай аймгийн хувьд байдаггүй. Энэ сарын 26-нд аймгийн ЗДТГ-ын ажилтнуудын цалин буусан. Цалингаас өөр ямар ч гүйлгээ гарахгүй, гарах гээд ч мөнгө байхгүй гэсэн мэдээллийг аймгийн ЗДТГ-ын Шилэн данстай харьцуулж харлаа. Арваннэгдүгээр сарын 23-нд “Хан Аттрибут” компанид 18 сая, “Сэцэд” компанид 38.5 сая, Улсын бүртгэлийн хэлтэст 11.9 сая, “Сэцэд” компанид дахин 25.6 сая, “Классик тохижилт ” компанид 38.6 сая төгрөг шилжүүлжээ. Мөн БТСГ-ын дансанд 7.2 сая, “Булган трейд” ХХК-д 25 сая, “Баганадант” ХХК-д 54.8 сая төгрөгийг, нийтдээ энэ сард 219.6 сая төгрөгийн гүйлгээ хийсэн байх юм. Манай аймгийн зарим нэг дарга нарын  “Засгийн газар тун удахгүй их хэмжээний зээл аваад Эрдэнэтчүүдээс зээлсэн мөнгөө эргүүлэн төлнө. Эдийн засаг ч сайжирна” хэмээх ярианаас харвал хувийн хэвшлийнхэний  толгой дээр мөддөө нар мандахгүй бололтой. Монгол улсын Ерөнхий сайд Ч.Сайханбилэг МҮОНРТ-ээр мэдэгдэл хийж “Оюутолгой” төслийн далд уурхайн бүтээн байгуулалтын ажил гацаанаас гарч өнөө маргаашгүй төрийн дансанд 70 сая ам.доллар буюу 140 тэрбум төгрөг орж ирнэ, он гараад нэг их удалгүй 4.5 тэрбум ам.долларын хөрөнгө оруулалт манайх руу урсах гэж байгаа тухай чихэнд чимэгтэй мэдээллийг дуулгасан. “Эдийн засаг, эдийн засаг бас дахин эдийн засаг” гэсэн уриа дэвшүүлсэн Ерөнхий сайдын хувьд дээрх мэдэгдэл нь иргэддээ барьсан шинэ жилийн бэлэг бололтой.