Орхон аймгийн 11 дэх Засаг дарга С.Дангаасүрэн энэ сарын 11-нд үе үеийн аймгийн Засаг дарга нарыг хүлээн авч хүндэтгэл үзүүлэв. Өнөөдрийн байдлаар манай аймгийн Засаг даргаар 11 хүн ажиллаж байжээ. Тэдний гурав нь болох С.Цэвээн, Т.Ганболд, Г.Зоригт нар ертөнцийн мөнх бусыг үзүүлсэн бол ихэнх нь орон нутагтаа ажиллаж, амьдарч байгаа аж. Энэ уулзалтад Орхон аймгийн хоёр дахь Засаг дарга Д.Тогооч, Д.Чагнаадорж, К.Даулетбай, Г.Шархүү, Д.Оюунбат, Д.Дэлгэрбаяр нар хүрэлцэн ирсэн юм. Үе үеийн Засаг дарга нар С.Дангаасүрэнг төрийн их ажлын хажуугаар биднийг цаг зав гарган хүлээн авч хүндэтгэл үзүүлсэнд баярлаж түүнд сэтгэлийн бэлэг болгож зэс домбо бэлэглэв. Эрдэнэт хотын дарга асан Д.Тогооч “Намайг хотын даргаар ажиллаж байсан тэр үед нэг талаас нь харахад сайхан байсан. Хот тохижуулах, үзвэр үйлчилгээ, сургууль, цэцэрлэг бүгд ГОК-д харьяалагддаг. Одоо хот маань улам том болж үүрэг хариуцлага нь ч нэмэгджээ. Өнөөдөр дунд шатны албан тушаалтнуудын ажлын хариуцлага муу сул байна. Үүнийг анхаарах хэрэгтэй шүү. Миний хувьд энэ хугацаанд зүгээр суусангүй. Эрдэнэт хотод 21 аймгаас ирсэн олон хүн цугласан. Энэ хүмүүст зориулж угийн бичиг хөтлөхөд нь тус дэм болох үүднээс энэ талын судалгааны ажил хийж эхний товхимол гаргаад байна. Үүнийг түгээн дэлгэрүүлэхэд анхаарлаа хандуулахыг хүслээ.” Засаг дарга асан К.Даулетбай “Манай аймаг өдрөөс өдөрт хаяа тэлэн өргөжиж түүний хэрээр хотын өнгө үзэмж нэмэгдэж байна. Хотынхоо хэтийн төлөвлөлт, дэд бүтцийн асуудлыг Засаг дарга болсон хүн бүхэн анхаарлынхаа төвд байлгах хэрэгтэй. Өмнөхтэй адил мөнгө хөрөнгөгүй гэдэг яриа одоо ард хооцорсон. Эхнээс нь бодлогоор авч явбал амар болов уу” гэсэн юм. Ирэх жил Эрдэнэт хот байгуулагдсаны түүхт 40 жилийн ойгоо бид тэмдэглэх гэж байгаа билээ. 2006 онд Эрдэнэт хотын 30 жилийн ойг Г.Шархүү даргын үед тэмдэглэж байсан бол 35 жилийн ойг Д.Оюунбат дарга санаачлан иргэдийнхээ хамтаар тэмдэглэн өнгөрүүлсэн байдаг. Үе үеийн Засаг дарга нар С.Дангаасүрэнд ажлын амжилт хүсээд Эрдэнэт хотын түүхт 40 жилийн ойг тэмдэглэн өнгөрүүлэх ажилд өөрсдийн мэдлэг чадвараа дайчлан хамтран ажиллахад бэлэн буйгаа илэрхийлэв. С.Дангаасүрэн үе үеийн Засаг дарга нарт дурсгалын зүйл, нэг, нэг сая төгрөгийн гарын бэлэг гардууллаа. Эрдэнэт хот, Орхон аймгийн Засаг даргаар ажиллаж байсан эрхмүүдийн он дарааллын бичиг: Эрдэнэт хотын анхны даргаар Самбуугийн Цэвээн 1976-1985 он Эрдэнэт хотын дарга Догсомын Тогооч 1985-1990 он Эрдэнэтийн анхны Засаг дарга Чойжилсүрэнгийн Доржпалам 1991-1996 он Орхон аймгийн Засаг дарга Төмөршагдарын Ганболд 1996-1998 он Орхон аймгийн Засаг дарга Доржваанчигийн Чагнаадорж 1998-2000 он Орхон аймгийн Засаг дарга Касений Даулетбай 2000-2004 он Орхон аймгийн Засаг дарга Гаадангийн Шархүү 2004-2008 он Орхон аймгийн Засаг дарга Даваадоржийн Оюунбат 2008-2011 он Орхон аймгийн Засаг дарга Дэмбэрэлийн Дэлгэрбаяр 2012 он Орхон аймгийн Засаг дарга Гүрсэдийн Зоригт 2012-2015 он Орхон аймгийн Засаг дарга Самбалхүндэвийн Дангаасүрэн 2015 оноос одоог хүртэл ажиллаж байна.