Соёл урлагийн ажилтны өдрийг энэ сарын 9-нөөс 11-ний өдрүүдэд зохион байгуулахаар бэлтгэл ажлаа хангаад байгаа талаар албаны хүмүүс мэдээлэл хийлээ. Энэ жилийн хувьд соёл урлагийн ажилтны өдрөөр уг салбарт ажиллаж байгаа уран бүтээлчдийн дунд төрөл бүрийн ажлууд зохион явуулахын зэрэгцээ залуучуудад чиглэсэн гадаа талбайн урлагийн тоглолт буюу шоу зохион байгуулах гэж байна. Орхон аймагт үйл ажиллагаа явуулж байгаа “Уурхайчин” соёлын ордон, “Эрдэнэт дуу бүжгийн чуулга”, Хүүхэд залуучуудын театр, Соёлын төвүүд, Номын төв зэрэг мэргэжлийн урлагийн байгууллагын ажилтнуудын ажлыг уялдуулж, илүү шинэлэг түвшинд гаргах олон ажлыг бодлогын түвшинд Боловсрол соёлын газар хийж байна. Үүнээс гадна хувийн хэвшлийн байгууллагууд, орон нутгийн телевизүүд хүүхэд залуусын дунд урлаг соёлын олон ажил хийдэг. Үүн дээр төрийн бодлого дутагдалтай, үүнийг шинэ шатанд гаргахын тулд ирэх оны төсөвт хөрөнгө тусгах талаар шинэ бодлого барихаа Боловсрол соёлын газраас барьж байна. Соёл урлагийн ажилтны өдрийг тохиолдуулан энэ сарын 9-10-ны өдөр Спортын бага наадам, 11-ний өдөр 11 цагт урлагийн ажилтнуудын баярын жагсаалыг хийнэ. Мөн 9-ний өдөр гадаа талбайд урлагийн тоглолтыг Эрдэнэтийн уран бүтээлчдийнхээ хүчээр зохион байгуулна. Энэ нь Эрдэнэтийн уран бүтээлчдийн бие даасан шоу тоглолт болох юм.