Орхон аймгийн Залуучуудын Холбоо, аймгийн ЗДТГ болон “Эрдэнэт Үйлдвэр” ХХК хамтран Төвийн бүсийн чуулганыг энэ сарын 7-9 ний өдрүүдэд Эрдэнэт хотноо зохион байгууллаа.  Чуулганд төвийн бүсийн 200 орчим залуу оролцсон байна. Зургаан жилийн дараа чуулсан залуус өнгөрсөн хугацаанд орон нутгийнхаа залуусын төлөө юу хийснээ тайлагнаж, цаашдаа юу хийж хэрэгжүүлэх тухайгаа хэлэлцэн санал бодлоо хуваалцжээ. Чуулганд МЗХ-ны ерөнхийлөгч А.Мөнхбат оролцож үндсэн илтгэлийг тавьсан. Үүний дараа МЗХ-ны Бодлого төлөвлөлтийн газрын дарга Ч.Хонгорзул орон нутаг дахь салбар зөвлөлүүдийн удирдлагын багийг чадавхжуулах сургалтыг зохион байгуулж, МЗХ-ны стратеги төлөвлөгөөг танилцууллаа. Үүнээс гадна залуучуудын нийгмийн идэвх оролцоог сайжруулах, эрүүл мэнд, боловсролын салбарын тулгамдсан асуудлууд,  бизнес эрхлэх нөхцөл боломж, МЗХ-ны салбар Залуучуудын Хөдөө аж ахуйн корпораци, Орон сууцны корпораци болон байнгын хороодыг бүс нутаг, аймаг сумын хэмжээнд байгуулах талаар санал бодлоо солилцлоо. Төлөөлөгчдийн олонхийн саналаар төвийн бүсийн чуулганыг жил бүр зохион байгуулахаар тогтлоо. Ирэх жил Дархан-Уул аймагт төвийн бүсийн чуулга уулзалтыг зохион байгуулахаар төлөвлөлөө. Ийнхүү гол асуудлаа хэлэлцсэний дараа  шилдэг залуус спортын төрөл бүрийн тэмцээн уралдаанд оролцлоо. Шилдэг аймгаар Булган аймгийн залуус тодорч “Шилжин явах цом”-ын эзэд боллоо. Энэ үеэр бусдыгаа ажил үйлсээрээ манлайлж буй залуусаа шагнаж урамшуулсан байна. У.Анхбаяр