Баяжуулах фабрикийн өргөтгөлийг хүлээн авах ёслолын үеэр “Эрдэнэт үйлдвэр” ХХК-ийн байнгын харилцагч, бизнесийн түнш байгууллага Худалдаа хөгжлийн банкнаас уурхайчдад нэгэн гэнэтийн бэлэг барьсан юм. Худалдаа хөгжлийн банкны гүйцэтгэх захирал Б.Мэдрээ, орлогч захирал Н.Орхон нар банкныхаа 25 жилийг ойг тохиолдуулан, мөн үйлдвэр банк хоёрын зах зээлийн 25 жилийн түншлэл, үйлдвэрийн өргөтгөлийн ажлыг өндрөөр үнэлж “Эрдэнэт үйлдвэр” ХХК-ийн 100 монгол, 100 орос залууг Сингапур улсад аялах эрхийн бичгээр шагнасан “Сертификат”-ыг үйлдвэрийн Ерөнхий захирал Ц.Даваацэрэн, нэгдүгээр орлогч захирал И.В.Рой нарт гардуулсан юм. Энэ үеэр Б.Мэдрээ хэлсэн үгэндээ “Энд би нэг бяцхан түүх яримаар байна. 1998 оны үед Д.Дорлигжав захиралтай Эрдэнэт үйлдвэрийн хамт олон дэлхийн зах зээл дээр зэсийн үнэ 1325 ам.доллар хүртлээ унаж, үйлдвэр алдагдалд орж болох байсан тэр үед манай банкнаас зээл авахыг хүссэн юм. Үйлдвэрийн хүссэн зээл нь 6 сая ам.доллар. Гэтэл бидэнд 3 сая ам.доллар байдаг. Ийм хүнд хэцүү цагт бид үйлдвэрийн нөхдүүдтэйгээ ярилцаад тэр үед манай улсад төдийлөн хэрэгжээгүй байсан Векселийн хуулийн дагуу энэ асуудлыг шийдэж байсныг эргэн санахад таатай байна. Бидний хамтын ажиллагаа Монгол улсад өмнө нь банкны системд ашиглаж байгаагүй Вексэлийн хуулийг хэрэгжүүлж зээлийн асуудлаа шийдэж байсан түүхтэй” хэмээсэн юм.