БОЭТ-өөс “Нээлттэй хаалганы өдөрлөг” зохион байгуулж, иргэдийн артерийн даралт, цусан дахь сахарын өөрчлөлт зэргийг үзэж, зөвлөгөө өгнө гэсэн мэдээллийн дагуу бид дараахь мэдээллийг бэлтгэлээ. Нэг өдрийн хугас хугацаанд явуулсан энэ ажилд иргэд ам сайтай байсан ч оношлуурын зарим хэрэглэгдэхүүн дууссан гэсэн шалтгаанаар иргэдийг багагүй бухимдуулсан нь өдөрлөг гэсэн нэрний утга алдагдахад хүрчээ. Тухайн иргэн эрүүл мэнддээ өөрөө анхаарал тавих ёстой ч төрөөс даатгалын журмаар санхүүждэг улсын эмнэлгүүд компаничилсан байдлаар оношлогоо хийх нь нэг ёсондоо тэдний үүрэг байдаг. Дээрх үүргийнхээ дагуу аймгийн БОЭТ-ийн амбулаторын тасгаас “Нээлттэй хаалганы өдөрлөг”-ийг зохион байгуулсан. Дээрх үйл ажиллагаанаас харахад, аливаа байгууллага нээлттэй хаалганы өдөрлөгөөр иргэдэд хүрч чадаагүй байнгын эрэлт хүсэлттэй зүйлсийг мэдээлэх, тэднээс санал хүсэлтийг нь авах зэрэг бүтээлч байдлаар ажилладаг. Гэтэл БОЭТ-өөс зохион байгуулсан энэ өдөрлөгийн зар мэдээллийг иргэдэд хүртээмжтэй хүргээгүй, иргэдийн санал хүсэлтийг хэрхэн хүлээн авч байгаа нь тодорхойгүй, эмнэлгийн ажилчид өөрсдөө зугаацаж цэнгэх гэж байгаа мэт ажлын цагаар байрныхаа гадаа олноороо үймж шуугисан, бүжиглэсэн дүр төрхтэй байсан. Энэ мэт нэрэндээ тохироогүй ажлын оронд нэг ч гэсэн хүний эрүүл мэндэд хэрэгтэй зөвлөгөө өгвөл ганц өдөр ч гэсэн нээлттэй хаалгатай эмнэлэг болох байлаа.